काठमाडौं । युवा तथा खेलकुदमन्त्री विराजभक्त श्रेष्ठले खेलकुद क्षेत्रकाे बेथितिका कारण खेलाडी पलायन भएको जनाएका छन् ।
मंगलबार खेलकुद पत्रकारहरूसँगको अन्तर्क्रियाका क्रममा उनले खेलाडीले खेलेर आत्मनिर्भर हुने वातावरण नेदेखेर विदेश गएको जनाएका हुन् ।
‘खेलकुदमा रहेका बेथितिहरूका कारण नै खेलाडी पलायन भइरहेका छन् । सैद्धान्तिक कुराभन्दा पनि अपनत्व, आत्मसम्मान र आत्मनिर्भर भन्ने कुरा बन्न नसक्दा खेलाडी पलायन बढ्दै गएको हो’, उनले भने । खेलकुदमा आकर्षण बढे पनि त्यही अनुसार खेलाडीले बाँच्न सक्ने अवस्था नबनेको मन्त्री श्रेष्ठले जनाए ।
‘खेलकुदमा चार्म बढ्यो तर व्यवसायिकता कति बढ्यो त भन्ने कुरा हो । खेलाडीले खेलेर आत्मनिर्भर हुने वातावरण चाहिन्छ’, उनले भने । पछिल्लो समय खेलकुदमा निजी लगानी बढिरहेको भन्दै उनले यसले खेलकुद क्षेत्रको विकास हुँदै जाने जनाए ।
‘निजी लगानीमा भैरहवामा स्टेडियम बन्यो । सबै कुरा सरकारले गर्छ भनेर भर नपरौं । भलिबलमा निजी स्पोन्सर्सहरू आएका छन् । यसरी नै खेलकुद विकास हुने हो’, मन्त्री श्रेष्ठले भने ।
