नेपालका राजनीतिक दलहरु व्यक्ति केन्द्रित हुने, पार्टीभन्दा गुटगत गतिविधि हुने र एउटा समूह बनाएर पार्टीमा अरुलाई निषेध गर्ने प्रवृत्ति पहिलेदेखि नै हो । यही प्रवृत्ति हालै राप्रपाको बैठकमा पनि देखिएको छ । राप्रपाको अनुशासनसम्बन्धी बैठकमा नेता ठाकुरमोहन श्रेष्ठले पार्टीका महामन्त्री विक्रम पाण्डेलाई ‘भ्रष्टाचारी’ को गम्भीर आरोप लगाए । यसले पार्टी बैठकमा नै तनाव उत्पन्न भयो । तर, घटना यतिमा मात्रै टुंगिएन । बैठकबाट बाहिरिएका श्रेष्ठमाथि पाण्डेका समर्थक कुटपिटमा नै उत्रिए । यो विषयमा प्रहरीसम्म उजुरी पुग्यो । राप्रपाको यस घटनाले नेपालका राजनीतिक दलहरुमा स्वस्थ बहस, पार्टीका अन्य नेतालाई सम्मानपूर्वक व्यवहार र सभ्य भाषा तथा व्यवहारको परिपाटी कम रहेको स्पष्ट पारेको छ ।
राजनीतिक दल तथा तिनका नेताको नीतिसिद्धान्त, आचरण, व्यवहार, भाषा, पहिरन जस्ता विषय अति नै महत्वपूर्ण हुन्छ । बेलाबेलामा देशको नै प्रतिनिधित्व गर्ने भएकाले पनि उनीहरुको आचरणलगायत कुरा ठूलो विषय बन्ने गरेको हो । अन्तर्राष्ट्रिय परिवेशमा पुग्दा नेताहरुको हरेक पक्षको चियोचर्चा हुने गरेको छ । राष्ट्रिय रुपमा एउटा राजनीतिक दल तथा तिनका नेतालाई लाखौंको जमाताका जनताले पछ्याइरहेका पनि हुन्छ । त्यसकारण एउटा राष्ट्रिय राजनीतिक दलको बैठकमा नै नेतामाथि हातपात हुने घटनालाई सामान्य मान्न सकिँदैन । यसले पार्टीका तल्लो तहका समिति, भातृसंगठन तथा जनतामा नै नराम्रो सन्देश प्रवाह गर्छ । पार्टीमाथि जनताको आस्थामा पनि कमी ल्याउँछ ।
नेपालका लागि धेरैजसो राजनीतिक दलहरु अध्यक्ष वा सभापति केन्द्रित छन् । उनीहरुलाई नै महत्वपूर्ण निर्णयको जिम्मेवारीका लागि छोडिने गरिन्छ । त्यसैले शीर्ष नेताहरुको चलखेल वा स्वार्थले मुलुकको समग्र राजनीतिमा नै असर पुग्ने गरेको छ । जस्तै, चुनावमा टिकट दिने, गठबन्धन गर्ने, सरकार गठन गर्ने, मन्त्री छान्ने मात्रै होइन, राजदूत र विश्वविद्यालयको उपकुलपति छान्ने विषयमा पनि शीर्ष नेताको नै हालिमुहाली चल्ने गरेको छ । यसले पार्टीमा लोकतान्त्रिक पद्धतिको अवलम्बन हुन सकेको छैन । पार्टी नेतृत्वले पनि मनपरी निर्णयहरु गर्दै आएका छन् । यसले पुराना राजनीतिक दलप्रति जनतामा निराशा बढेको छ ।
राजनीतिक दलमा भ्रष्टाचार, अनियमिततामा संलग्न नेताहरुलाई पनि संरक्षण गर्ने प्रवृत्ति उत्तिकै छ । आफ्नो पार्टीको भए जस्तोसुकै अपराध गरेर पनि कानुनी कारबाहीबाट बचाउने, पार्टीका शीर्ष नेतृत्वले जस्तोसुकै गलत काम गरे पनि विरोध गर्न नसक्ने र पार्टीभित्र गुट चलाएर राजनीतिक हैसियत टिकाउन खोज्ने प्रवृत्तिका कारण हाम्रा राजनीतिक दलहरु पनि विचलनको दलदलमा भासिँदै गएका छन् । सरकार भनेको तिनै राजनीतिक दल र नेताले चलाउने हुन्छन् । त्यसकारण दलमा राम्रो गर्न नसकेका नेताहरुले सरकार भने देश र जनताको चाहनाअनुरुप सञ्चालन गर्छन् भन्नु मूर्खतासिवाय केही होइन । त्यसकारण सर्वप्रथम त नेपालका राजनीतिक दल तथा तिनका नेताले राजनीतिक संस्कार सिक्न आवश्यक छ । लोकतान्त्रि पद्धति मान्ने होस् वा वामपन्थी दल आफ्नो सिद्धान्तअनुसार पार्टी सञ्चालन गर्न आवश्यक छ । अनि मात्र त्यस्तो दल वा नेता राष्ट्रका लागि योग्य साबित हुनेछ । जनधारणा साप्ताहिक