काठमाडौं । संस्थापक समूह, प्रभावित स्थानीय, कर्मचारी तथा म्युचुअल फण्डको स्वामित्वमा रहेका विभिन्न ४ कम्पनीका सेयरमा चैतका विभिन्न दिनमा लकइन अवधि सकिने भएको छ । सेयर रजिस्टार कम्पनीहरुले छुट्टाछुट्टै सार्वजनिक सूचना जारी गर्दै लकइन अवधि सकिनेबारे जानकारी गराएका छन् ।
सिंगटी हाइड्रोपावरको संस्थापक, आयोजना प्रभावित तथा कर्मचारीको सेयरमा चैत २५ देखि लकइन अवधि सकिने भएको छ । चैत २६ गतेदेखि ती सेयर सर्वसाधारणसरह कारोबारका लागि खुला हुनेछ । सिंगटीको संस्थापक समूहको १ करोड १ लाख ५० हजार कित्ता, प्रभावित स्थानीयको १४ लाख ५० हजार कित्ता र कर्मचारीको ५८ हजार कित्ता सेयरमा चैत २५ देखि लकइन अवधि सकिने भएको हो ।
त्यस्तै म्युचुअल फण्डहरुको स्वामित्वमा रहेको हाथवे इन्भेस्टमेन्ट कम्पनीको ३६ हजार ५१२ कित्ता सेयरमा लकइन अवधि चैत १ देखि समाप्त हुने भएको छ । चैत २ गतेदेखि ती सेयर कारोबारका लागि फुकुवा हुने सेयर रजिस्ट्रार कम्पनी ग्लोबल आईएमई क्यापिटलले जनाएको छ ।
अर्को सोनापुर मिनरल्स एण्ड आयल कम्पनीको म्युचुअल फण्डसँग रहेको केही सेयरमा पनि लकइन अवधि चैत २३ देखि सकिँदैछ । म्युचुअल फण्डसँग भएको सोनापुरको ४ लाख २ हजार १९ कित्ता सेयरमा चैत २४ देखि कारोबार फुकुवा हुने सेयर रजिस्ट्रार कम्पनी एनआईएमबीएस क्यापिटलले जनाएको छ ।
सूर्याज्योति लाइफ इन्स्योरेन्सको कर्मचारीलाई सुरक्षित गरिएको २ लाख ९९ हजार २९३ कित्ता सेयरमा चैत २० देखि लकइन अवधि सकिने भएको छ । सो कम्पनीकै संस्थापक समूहबाट सर्वसाधारण समूहमा परिणत भएको ३७ लाख ९१ हजार ९१ कित्ता सेयरमा पनि चैत २० देखि नै लकइन अवधि सकिने भएको छ । यी सेयर साधारणसरह चैत २१ देखि कारोबार हुन सक्नेछ । सो कम्पनीको १ करोड १ लाख ७५ हजार ९७९ कित्ता संस्थापक सेयरमा चैत २० देखि नै लकइन अवधि सकिनेछ । तर यो संस्थापक सेयरको कारोबार संस्थापक–संस्थापकबीच मात्रै हुन सक्नेछ ।
सेयरमा लकइन अवधि सकिएपछि थप सेयर कारोबारका लागि फुकुवा हुने भएकाले आपूर्ति बढ्न सक्दछ । आपूर्ति बढेवापत मूल्यमा पर्न सक्ने दवावलाई मध्यनजर गर्दै लकइन अवधि सकिनेबारे पहिले नै जानकारी गराउनुपर्ने व्यवस्था गरिएको छ । सोबमोजिम सर्वसाधारण लगानीकर्ताले खरिदबिक्रीमा आफ्नो रणनीति तय गर्न सक्नेछन् ।
