काठमाडौं । यस बर्षकाे शिवरात्री नजकिएसँगै पशुपति मन्दिरमा जोगी र साधुसन्तहरुको चहलपहल ह्वातै बढेकाे छ ।
महाशिवरात्रि पर्वका लागि विभिन्न स्थानबाट साधुसन्त पशुपतिनाथ मन्दिर परिसरमा आउने क्रम अहिले जारी छ ।
मंगलबार बेलुकासम्म तीन हजार बढी साधुसन्त पशुपति क्षेत्रमा आइसकेका पशुपति क्षेत्र विकास कोषले जनाएको छ । साधुसन्त र जोगीबाबाहरुको क्रियाकलापले धेरैको ध्यान खिच्ने गर्दछ । त्यसैले साधुसन्त बसेको ठाउँमा पनि दर्शनार्थीहरुको सहभागीता उल्लेख्य हुने गरेको छ ।
सरकारले सार्वजनिक स्थानमा धूमपान र मद्यपान निषेध क्षेत्र घाेषित गरेता पनि अझै पनि कानुन छुन सकेकाे छ । उनीहरू आफूलाई भगवान शिवका प्रतीक मान्ने गरिन्छ । उनीहरु निष्फिक्री गाँजा तानीरहेका छन् ।
शिवरात्रि पर्व मनाउन पशुपति आएका साधुसन्त तथा जोगी बाबाहरुलाई भोजनसहित धुनीको व्यवस्था मिलाइएको छ । गुठी संस्थानको पशुपति गोश्वारा कार्यालय प्रमुख उमा आचार्यका अनुसार पशुपति क्षेत्रका गोरखनाथ, राममन्दिर, निर्मल र भष्मेश्वर अखडामा भोजन र धुनीको व्यवस्था मिलाइएको हो ।
