एजेन्सी । आयोजक तथा साविक विजेता कतार एएफसी एसियन कप फुटबलको फाइनलमा प्रवेश गरेको छ ।
घरेलु मैदान अल थुमामा स्टेडियममा बुधबार राति सम्पन्न प्रतिस्पर्धात्मक बनेको दोस्रो सेमिफाइनल खेलमा इरानलाई ३-२ गोल अन्तरले पराजित गर्दै कतार फाइनलमा प्रवेश गरेको हो ।
तीन पटकको च्याम्पियन इरानविरुद्ध जित निकाल्ने क्रममा कतारका लागि जेसिम गाबेर, अफिफ र अलमोएज अलिले एक एक गोल गरे ।
इरानका सरदार अजमोन र अलिरेजा जाहानबाक्सले एक एक गोल गरेपनि टोलीलाई हारबाट जोगाउन सकेनन् । शुरुवाती चौथो मिनेटमै अजमोनको गोलबाट इरानले खेलमा पहिलो अग्रता लिएको थियो ।
१७ औं मिनेटमा गाबेरले कतारका लागि बराबरी गोल गरे । अफिफले ४३ औं मिनेटमा गोल गरेपछि पहिलो हाफमा कतार २-१ ले अघि रहेको थियो ।
५१ औं मिनेटमा इरानका जाहानबाक्सले पेनाल्टीमार्फत गोल गरेपछि खेल २-२ गोलको बराबरी अवस्थामा पुगेको थियो। तर खेलको ८२ औं मिनेटमा अलिलले गोल गर्दै कतारलाई ३-२ गोल अन्तरको जित दिलाए ।
समूह चरणका सबै तीन खेल जितेर समूहमा विजेता बन्दै अन्तिम १६ मा स्थान बनाएको कतार प्यालेस्टाइनलाई हराउँदै क्वार्टरफाइनलमा प्रवेश गरेको थियो । कतार क्वाटरफाइनलमा उज्वेकिस्तानलाई पेनाल्टी सुटआउटमा पराजित गर्दै सेमिफाइनलमा पुगेको थियो ।
यता समूहका सबै खेल जित्दै शीर्ष स्थानमा रहेर अन्तिम १६ मा प्रवेश पुगेको इरान सिरियालाई पेनाल्टी सुटआउटमा हराउँदै क्वार्टरफाइनलमा स्थान पक्का गर्न सफल भएको थियो ।
इरान क्वाटरफाइनलमा जापानलाई स्तब्ध पार्दै अन्तिम चारमा पुगेको थियो । अब कतारले शनिबार हुने फाइनलमा उपाधिका लागि जोर्डनसँग प्रतिस्पर्धा गर्नेछ ।
जोर्डन यसअघि मंगलबार भएको पहिलो सेमिफाइनल खेलमा दक्षिण कोरियालाई २-० गोलले पराजित गर्दै फाइनलमा पुगेको थियो । जोर्डनले इतिहासमा पहिलो पटक एसियन कपको फाइनलमा स्थान बनाएको हो ।
