वीरगञ्ज / मालपोत कार्यालय पर्साका तत्कालीन नायब सुब्बा मदनप्रसाद गुप्ता र लेखापाल नागेन्द्रप्रसाद चौधरी भ्रष्टाचार मुद्दामा दोषी ठहर भएका छन्।
विशेष अदालतमा परेको राजश्व रकम हिनामिनासम्बन्धि भ्रष्टाचार मुद्दामा न्यायाधीश टेकनारायण कुँवर, नारायण सिंह राई र रितेन्द्र थापाको इजलासले उनीहरुलाई दोषी ठहर गरेको हो।
गुप्तालाई पाँच र चौधरीलाई ४ वर्ष कैद सजाय सुनाइएको छ। दुवै जनालाई जनही ९५ लाख ८ हजार ३४ रुपैयाँ जरिवाना भएको विशेष अदालतका प्रवक्ता धनबहादुर कार्कीले जानकारी दिए।
उनीहरुविरुद्ध अख्तियार दुरुपयोग अनुसन्धान आयोगले ०७९ चैत २८ गते भ्रष्टाचार मुद्दा दायर गरेको थियो।
अख्तियारले मालपोत कार्यालयमा आर्थिक वर्ष २०७२/७३ मा जग्गा किनबेचका क्रममा विभिन्न लिखतबाट उठेको राजस्व रकम नियमअनुसार दाखिला नगरी हिनामिना गरेको आरोपमा मुद्दा दायर गरेको थियो।
