मोरङ / विराटनगरको एक होटलमा बुधबार श्रमको सम्मान हुँदा मुलुक विकास हुन्छ भन्दै अभिव्यक्ति दिएका कोशी प्रदेशका मुख्यमन्त्री केदार कार्की अपराह्न एक ब्यापारिक मेलामा भेटिए।
विराटनगरको शंकरपुरमा पुस १६ गतेसम्म आयोजना हुने मोरङ व्यापार संघ टे«ड एक्स्पो २०२३ मा स्थलगत निरीक्षणमा मुख्यमन्त्री केदार कार्की पुगेका थिए।
सुरक्षा तामझाम नगरी सामान्य तवरमा उनले एक्स्पोको टिकट खरिद गरी एक्स्पो प्रवेश गरेका थिए। बिहान एक होटलमा आयोजित सामाजिक विकास मन्त्रालयको कार्यक्रममा श्रमको सम्मान गर्नुपर्नेमा जोड दिएका मुख्यमन्त्री कार्कीले आमनागरिकसरह व्यक्तिगत, आफ्नो सचिवायल, सुरक्षाकर्मी गरी १२ जनाको टिकट खरिद गरी ट्रेड एक्स्पोमा प्रवेश गरेका थिए।
मुख्यमन्त्री कार्कीले भने, ‘सबै श्रमको सम्मान हुनुपर्छ। यहाँ पनि आर्थिक क्षेत्र चलायमान बनाउन निजी क्षेत्र लागिपरेको छ। यसको सम्मानमा टिकट काटेर अवलोकन गरे। मलाई लाग्छ टिकट काटेर आउनुले उत्साहित नै बनाउनेछ।’
आयोजक ट्रेड एक्स्पो तथा मोरङ ब्यापार संघका अध्यक्ष नवीन रिजालले भने, ‘टिकट काटेरै यस्ता आयोजना अवलोकन गर्नुपर्छ भन्ने सन्देश दिन मुख्यमन्त्रीले प्रयास गर्नुभएको हो। यसलाई हामी सबैले अनुसरण गर्न आवश्यक छ।’
अध्यक्ष रिजालले भने, ‘विराटनगरमा हुने विभिन्न कार्यक्रममा निःशुल्क तथा पासको माग गर्नेको संख्या अधिक हुने हुँदा मुख्यमन्त्री आफैँले टिकट काटेर एक्स्पो अवलोकन गर्न आउनुभएकोमा हामी आयोजक र व्यवसायी उत्साहित भएका छौँ।’
अध्यक्ष रिजालले सुस्ताएको आर्थिक क्षेत्रलाई केही चलायमान बनाउन सकिने उद्देश्यसहित विषम परिस्थिति जान्दाजान्दै पनि एक्सपो आयोजना गरिएको बताए। अपराह्न ५ बजे एक्स्पोमा प्रवेश गरेका मुख्यमन्त्री कार्की आधा घण्टाको समय बिताएको उनका स्वकीय सचिव दिवस राजवंशीले जानकारी दिए।
यसक्रममा मुख्यमन्त्री कार्कीले स्वदेशीदेखि विदेशी उत्पादनबारे चासो राखेका थिए। एक्स्पोमा रहेको प्रदेश सरकारको सामाजिक विकास मन्त्रालयअन्तर्गत रोजगारी सूचना केन्द्रदेखि साना घरेलु उद्योग र हस्तकला उत्पादनबारे चासो लिएका थिए।
हालसम्म करिब ८० हजार सर्वसाधारणले अवलोकन गरेको आयोजक पक्षले जनाएको छ। पुस ६ गतेदेखि १६ गतेसम्म हुने एक्सपोमा २ सय बढी ब्यापारिक स्टल छन्। भारत, पाकिस्तान, बंगलादेशलगायत छिमेकी राष्ट्रका विभिन्न उत्पादनसँगै स्वदेशी कृषि, औद्योगिक तथा सेवा क्षेत्रका उत्पादन प्रदर्शन र बिक्रीमा राखिएका छन्।
