मोरङ – विराटनगरबाट स्रोत नखुलेको १६ लाख रुपैयाँभन्दा बढी रकमसहित एक जना पक्राउ परेका छन्।
सशस्त्र प्रहरी बल कोशी प्रदेशका प्रवक्ता सशस्त्र प्रहरी वरिष्ठ उपरीक्षक रविनराज कर्णिजितका अनुसार विराटनगर महानगरपालिका–७ बाट ४० वर्षीय लक्ष्मणप्रसाद साहलाई मंगलबार १६ लाख १० हजार नेपाली रुपैयाँसहित पक्राउ गरिएको हो।
उनका अनुसार बरामद गरिएको रकम अवैध हुण्डी कारोबारको रहेको अनुमान छ। पक्राउ परेका साहको साथबाट एक हजार दरका ८ सय ८५, पाँच सय दरका १२ सय ६९, एक सय दरका ९ सय, ५० दरका ५, २० दरका १२ र १० दरको एक थान नोट बरामद भएको थियो।
प्रहरीका अनुसार पक्राउ परेका साह विराटनगर–१५ रानी निवासी हुन्। को १९ प ४४३४ नम्बरको मोटरसाइकलमा सवार साहलाई शंका लागेर रानीस्थित प्रस्तावित सीमा सुरक्षा गुल्मको टोलीले चेकजाँच गरेको थियो।
चेकजाँचका क्रममा साहले आफूसँग रहेको रकमको स्रोत खुलाउन नसकेपछि पक्राउ गरी सशस्त्र प्रहरीको टोलीले राजश्व अनुसन्धान कार्यालय इटहरीमा बुझाइएको छ।
