काठमाडौं । गैरआवासीय नेपाली संघ (एनआरएन) अध्यक्ष कुल आचार्यले नेपाली नागरिकता पाएसँगै फेरि मातृभूमिसँग फेरि जोडिन पाउँदा भावुक बनेको जनाएका छन् ।
प्रधानमन्त्री निवास बालुवाटारमा आज आयोजित गैरआवासीय नागरिकता वितरण कार्यक्रममा बोल्दै आचार्यले सो कुरा जनाएका हुन् । आफूहरु मातृभूमिलाई गुन तिर्न चाहेको जनाउँदै उनले भने, ‘हामीहरुसँग भएको स्रोत, साधन, सिप, अनुभव र विश्वव्यापी सन्जाल उपयोग गरेर मातृभूमिको सेवा पाउने मौका अब प्राप्त भएको छ ।’
गैरआवासीय नेपाली नागरिकताले अभिभावकहरुसँगै छोराछोरी र नातीनातिनालाई पनि नेपालसाग जोड्ने भन्दै उनले वंशजको आधारमा प्राप्त नागरिकता निरन्तरताका लागि नेपाल सरकार र राजनीतिक दलहरुलाई आग्रहसमेत गरे । यसले गर्दा भूतपूर्व गोर्खाहरुले सम्मान पाउने मात्र होइन, नेपालको सम्पत्ति नेपालमै रहने उनको धारणा छ ।
गैरआवासीय नेपालीहरुलाई मातृभूमिको माटो विदेशको माटोमा नमिसाइदिन उनले आग्रह पनि गरे । ‘त्यो माटोलाई यही राख्दिनुस् । त्यसले मात्र हाम्रो सन्ततीलाई पनि नेपालसँग जोड्न सकिन्छ,’ आचार्यले भने, ‘यो नागरिकताले अझ त्यसमा बल पुग्ने छ भन्ने मैले विश्वास लिएको छु ।’
