मोरङ । असोज कोशी प्रदेश प्रहरी कार्यालय बिराटनगरका प्रमुख प्रहरी नायव महानिरीक्षक राजेशनाथ बास्तोलाको प्रमुख आतिथ्यतामा ६८औं प्रहरी दिवसको अवसरमा बिहीबार वृक्षरोपण कार्यक्रमको आयोजना गरिएको छ ।
नेपाल प्रहरी बिशेष सुरक्षा गण दुहवी परिसमा आयोजित उक्त कार्यक्रममा उपस्थित प्रहरी अधिकृत तथा प्रहरी जवानहरूद्वारा विभिन्न जातका १ सय भन्दा बढी बिरूवाहरु रोपिएको थियो । वृक्षरोपणको क्रममा प्रहरी नायव महानिरीक्षक बास्तोलाले रोपिएका बिरूवाको संरक्षण, सम्वर्धन समेत गरी वातावरणलाई सफा, स्वच्छ, सुन्दर तथा सन्तुलित बनाउने कार्यमा सम्पूर्ण प्रहरी कर्मचारी निरन्तर लाग्नुपर्ने बताउनुभयो ।
उक्त कार्यक्रममा नेपाल प्रहरी श्रीमती संघ कोशी प्रदेशकी अध्यक्ष श्रीमती अजिता देवकोटा बास्तोला तथा संघका पदाधिकारीहरु समेतले वृक्षरोपण गरेका थिए । ६८औं प्रहरी दिवसको अवसरमा कोशी प्रदेश प्रहरी कार्यालय तथा अन्तर्गतका सम्पूर्ण प्रहरी कार्यालय परिसरमा एक हजार भन्दा बढी विभिन्न जातको रूख तथा फलफुलका बिरूवाहरु रोपिएका छन् ।
