झापा / नेपाल कम्युनिष्ट पार्टीका महासचिव नेत्रविक्रम चन्द ‘विप्लव’ले नेपाल २१औँ शताव्दीको उपनिवेश बन्न लागेको बताएका छन् ।
समाजवादी मोर्चाले बुधवार झापाको बिर्तामोडमा गरेको सन्देश सभालाई सम्बोधन गर्दै उनले मुलुक अत्यन्तै जटिल अवस्थामा रहेको बताएका हुन् ।
‘नेपाल देश नै रहन्छ कि रहन्न भन्ने स्थितिमा छ, यदि हामीले जथाभावी यति कै छाडिदियौँ भने नेपाल देश नै कता पुग्छ भन्ने अवस्थामा पुगेको छ,’ उनले भने ।
नेपालमा विदेशी सेनाहरु प्रत्यक्ष आउने अवस्थामा पुगेको, साम्राज्यवादी देशका सेनाको ठूलाठूला हवाइजहाज काठमाण्डौमा आउने र तीनले ल्याएका सामानहरु बिना जाँच गाडीमा राखेर लगिने गरेको उनले बताए ।
साम्राज्यवादी मुलुकहरुले नेपाललाई सैनिक अखडा बनाउन लागेको उनको भनाइ थियो । नेपालको इतिहासमा अहिले नेपाल अत्यन्तै जोखिमपूर्ण स्थितिमा रहेको उनले बताए।
उनले अमेरिकालगायत अन्य केही मुलुकहरूले नेपालमा द्वन्द्व सिर्जना गर्न खोजिरहेको आरोप लगाउनुभयो । यही मौकामा अहिलेको परिवर्तन नचाहनेहरूले परिवर्तन उल्ट्याउन खोजिरहेको विप्लवको भनाइ थियो । तर परिवर्तन नचाहनेहरूलाई नेपालका कम्युनिष्टहरूले तह लगाउने उनले बताए ।
विप्लवले भने, ‘यहाँका मान्छे मरेका छैनन् । जनयुद्ध मरेको छैन । अहिलेको परिवर्तनलाई उल्ट्याउन खोज्नेहरू पानीको फोका जस्ता हुन् । नेपालका कम्युनिष्टलाई नजरअन्दाज नगर्नु होला ।’
राजनीतिक दललाई देशमा विदेशी शक्तिहरूको हस्तक्षेपका विषयमा गम्भीर हुन उनले आग्रह गरे । अहिलेको संविधान अग्रगामी भए पनि अपुरो रहेको उनको भनाइ थियो ।
