काठमाडौं । विवादास्पद धर्मगुरु आचार्य श्रीनिवासमाथि सार्वजनिक शान्तिविरुद्धको कसुरमा मुद्दा दर्ता भएको छ।
उत्तेजित अभिव्यक्ति दिएको आरोपमा सुनसरीको बराहक्षेत्र नगरपालिका–चक्रघट्टीबाट सुन्सरी प्रहरीले उनलाई मंगलबार पक्राउ गरेको थियो। मंगलबार पक्राउ परेका धर्मगुरु आचार्यमाथि आज जिल्ला प्रशासन कार्यालय धनुषामा मुद्दा दर्ता भएको धनुषा प्रहरी प्रवक्ता डीएसपी रञ्जन अवाले बताएका छन्।
आचार्यले असोज १२ गते जनकपुरधाममा भएको विरोध कार्यक्रमममा हिंसात्मक अभिव्यक्ति दिएका थिए। सोही अभियोगमा उनीमाथि मुद्दा चलाइएको प्रहरीले जनाएको छ।
यसअघि २०७४ चैत २५ मा आफ्नै पाखुरामा गोली हान्न लगाएको आरोपमा समेत उनी पक्राउ परेका थिए। यद्यपि उनले बयानका क्रममा भने आफूले अहिलेसम्म कमिलासमेत नमारेको बताउँदै मान्छे मार्न आदेश नदिएको बताएका थिए। आफू आवेशमा आएर गलत अभिव्यक्ति दिएको स्वीकार गरेको प्रहरीले जनाएको छ।
मुलुकी फौजदारी कार्यविधिमा सार्वजनिक शान्ति खलल पार्ने कसूरसम्बन्धी मुद्दामा एक वर्ष कैद र दश हजार जरिवाना हुनसक्ने उल्लेख छ।
