काठमाडाैं । अमेरिकी सहयोग परियोजना एमसिसीकी प्रमुख कार्यकारी अधिकृत एलिस अल्ब्राइट नेतृत्वको टोली काठमाडाैं आइपुगेकाे छ ।
टोली कतार एअरवेजको उडान नम्बर क्युआर ६४६ मा दोहा हुँदै हिजो साँझ साढे ५ बजे नेपाल आइपुगेको हो । प्रधानमन्त्री चीनको आठ दिने औपचारिक भ्रमण पूरा गरेर फर्कनुभएको भोलिपल्ट अमेरिकाबाट उच्चस्तरीय टोली आएको हो ।
पाँच दिन विभिन्न भेटघाटमा सहभागी हुने टोलीमा एमसिसी भाइस प्रेसिडेन्ट तथा कँग्रेसनल एण्ड पब्लिक अफेयर्स आइसा हाउस पनि रहेको बुझिएको छ ।
त्यसैगरी यसअघि पटक पटक नेपाल आइसकेका युरोप,एसिया प्यासिफिक,ल्याटिन अमेरिकी मुलुक हेर्ने डेपुटी भाइस प्रेसिडेन्ट जोनाथन ब्रुक्स,सिइओ अल्ब्राइटकी विशेष सल्लाहकार सियरा रुथेरमिच र कम्प्याक्ट अपरेसन डिपार्टमेन्टका एसोसिएट डाइरेक्टर मोनिका चाभेज पनि टोलीमा छन् ।
उनीहरुलाई स्वागत गर्न विमानस्थलमा एमसिसीको नेपालस्थित कन्ट्री डाइरेक्टर डियन फ्रान्सिस्को र डेपुटी कण्ट्री डाइरेक्टर सञ्जय पौडेल पुगेका थिए । टोली नक्सालस्थित मेरियट होटलमा बसेको छ ।
