काठमाडौं । प्रधानमन्त्री पुष्पकमल दाहाल ‘प्रचण्ड’ले नेपाल लगानीको आकर्षक गन्तव्य भएको र यहाँ लगानीको अनुकूल वातावरण रहेको बताएका छन् ।
शुक्रबार सिंहदरबारमा आयोजित लगानी बोर्डको १२ औं वार्षिकोत्सवको अवसर आयोजिक कार्यक्रमलाई सम्बोधन गर्दै प्रधानमन्त्री प्रचण्डले यस्तो बताएका हुन् । उनले भने, ‘‘तुलनात्मक र प्रतिस्पर्धात्मक लाभका क्षेत्रमा लगानीका अवसरहरू प्रशस्त छन् । म लगानीकर्ताहरुलाई नेपालमा लगानी गर्न आग्रह गर्न चाहन्छु ।’’
प्रधानमन्त्रीले लगानीकर्ताको लागानीका प्रभावकारी सदुपयोग गर्न सरकार प्रतिबद्ध रहेको बताए ।
उनले भने, ‘‘सरकार तपाईंको लगानीको प्रभावकारी सदुपयोग गर्न प्रतिबद्ध छ । हामी ठूला वा साना हरेक लगानीलाई महत्त्व दिन्छौं, र हामी ती लगानीहरूलाई जोखिममुक्त गर्न प्रतिबद्ध छौं । म यसमा सबै लगानीकर्ता र सरोकारवालालाई लगानी बोर्ड नेपाल र अन्य सम्बन्धित सरकारी संयन्त्रले तपाईंलाई उत्कृष्ट सेवाहरू प्रदान गर्ने आश्वासन दिन्छु ।’’
उनले व्यवसाय र लगानीको वातावरण सुदृढ गर्न नीतिगत, कानुनी, नियामक, प्रक्रियागत र संस्थागत व्यवस्थामा निरन्तर सुधार गर्न सरकार प्रतिबद्ध रहेको पनि बताए ।
उनले भने, ‘‘संविधानको मर्मअनुसार लगानीमैत्री वातावरण बनाउन सबै तहका सरकारबीच समन्वय र सहकार्य अपरिहार्य छ । हामीले विभिन्न तहका सरकारहरू बीचको समन्वय र सुदृढीकरणका लागि विभिन्न उपकरण र संयन्त्रहरू विकास गर्दै आएका छौं ।’’
