रुसी राष्ट्रपति भ्लादिमिर पुटिनले भारतीय प्रधानमन्त्री नरेन्द्र मोदी समक्ष आफू जी-२० राष्ट्रहरूको शिखर सम्मेलनमा सहभागी नहुने बताएका छन् । आगामी सेप्टेम्बरमा भारतको नयाँदिल्लीमा हुने जी-२० राष्ट्रहरूको सम्मेलनमा आफू सहभागी नहुने पुटिनले जानकारी दिएका हुन् ।
भारत आयोजक रहेको यसपटकको जी-२० राष्ट्रहरूको सम्मेलन राजधानी नयाँदिल्लीमा सेप्टेम्बर ९ देखि ११ सम्म हुनेछ । पुटिनले मंगलबार मोदीलाई टेलिफोन गर्दै आफ्नो सरकारको प्रतिनिधित्व गर्दै सम्मेलनमा रुसी विदेशमन्त्री सर्गेइ लाभरोभ उपस्थित हुने जानकारी दिए ।
दुई नेताहरूबीच आपसी चासोका क्षेत्रीय र विश्वव्यापी मुद्दाहरूबारे पनि छलफल भएको भारत सरकारले जारी गरेको विज्ञप्तिमा उल्लेख छ । रुसका अधिकारीले भने पुटिन व्यस्त कार्यतालिकाका कारण सम्मेलनमा सहभागी हुन नसक्ने जनाएका छन् ।
जी-२० राष्ट्रहरूको समूहमा युरोपियन युनियन र १९ वटा धनी देशहरू सम्मिलित छन् । हरेक सम्मेलन आलोपालो आयोजना गर्ने तालिका अनुसार यसपटक भारत आयोजक बनेको हो । यस सम्मेलनमा अमेरिकी राष्ट्रपति जो बाइडेन र बेलायती प्रधानमन्त्री ऋषि सुनकसहितका विश्वका प्रभावशाली नेताहरू सहभागी हुनेछन् ।
यद्यपि पुटिनको अनुपस्थितिलाई रुस युक्रेन युद्धको असरका रुपमा पनि हेरिएको छ । जवकि गत साता दक्षिण अफ्रिकामा भएको ब्रिक्स सम्मेलनमा पनि पुटिन सहभागी थिएनन् । त्यसबेला पुटिन पक्राउ पर्नसक्ने भयका कारण उपस्थित नभएको अन्तर्राष्ट्रिय मिडियाले जनाएका थिए । पुटिनले दक्षिण अफ्रिकाको ब्रिक्स सम्मेलनलाई भिडियो सन्देशबाटै सम्बोधन गरेका थिए । मोदीले भने पुटिनलाई आफ्नो निम्तोमा सहयोग गरेकोमा धन्यवाद दिँदै पुटिनको निर्णयमा समझदारी व्यक्त गरेका छन् ।
