काठमाडौं । नेकपा (एकीकृत समाजवादी) पार्टीका अध्यक्ष माधव नेपालले भ्रष्टाचारविरुद्धको पहलकदमीले माओवादी केन्द्रका अध्यक्ष पुष्पकमल दाहाल प्रचण्ड नेतृत्वको सरकारको छवि राम्रो बनेको बताएका छन् ।
मंगलबारबाट सुरु भएको पार्टीको केन्द्रीय कमिटीको बैठकमा राजनीतिक प्रतिवेदन पेस गर्दै अध्यक्ष नेपालले भ्रष्टाचारविरुद्ध र सुशासनको पक्षमा उभिएकाले सरकारको छवि राम्रो बनेको बताएका हुन् । उनले ललिता निवासको सरकारी जग्गा हिनामिना, नक्कली भुटानी शरणार्थी र सुन तस्करी प्रकरणमा सरकारले देखाएको तदारुकता प्रशंसनीय भएको बताएका छन् ।
‘भ्रष्टाचारविरुद्धको पहलकदमीले सरकारको छवि राम्रो बनेको छ,’ प्रतिवेदनमा नेपालले भनेका छन्, ‘नक्कली भुटानी शरणार्थी, ललितानिवास, सुन तस्करीजस्ता घटनामा सरकारको तदारुकता प्रशंसनीय छ ।’
अध्यक्ष नेपालले मिटरब्याज पीडितहरूको पक्षमा ऐन बनाएर सरकारले कारबाही अघि बढाएको पनि बताएका छन् । ‘भ्रष्टाचारविरुद्ध र सुशासनको पक्षमा अझ बढी केन्द्रित हुँदै अर्थतन्त्रलाई फेरि सहज बनाउन गठबन्धनमा छलफल भएका छन् । पार्टीले सरकारलाई प्रभावकारी बनाउन आगामी दिनमा पनि ध्यान दिनुपर्छ,’ उनले भनेका छन् ।
अध्यक्ष नेपालले वर्तमान सरकार उपयुक्त दायित्व पूरा गर्नै प्रयत्नशील रहेको बताएका छन् । ‘अहिलेको सरकार उपयुक्त दायित्व पूरा गर्न प्रयत्नशील छ,’ उनले भनेका छन्, ‘वर्तमान सरकारमा हामी पनि छौँ । हामीले सरकारबाट राष्ट्रियता, लोकतन्त्र र जनजीविकाका पक्षमा प्रभावकारी ढंगले काम गर्नुपर्छ ।’
