काभ्रे / बनेपाबाट काठमाडौंतर्फ जाँदै गरेका धुलिखेल नगरपालिका—८ का २२ वर्षीय अभिषेक न्यौपानेको मोटरसाइकल बनेपा–१३ भैंसेपाटीमा दुर्घटनामा परी मृत्यु भयो । कार्यालयको कामका सिलसिलामा हिँडेका उनी मंगलबार बिहान सवा १० बजेतिर आफूले चलाएको बा प्र–०२–०३४ प ११६७ नं को मोटरसाइकल साँगा–धुलिखेल खण्ड बिस्तारका लागि सडक छेउमा अव्यवस्थित ढंगले राखिएका निर्माण सामग्रीका कारण दुर्घटना भएको प्रत्यक्षदर्शीले बताएका छन् ।
निर्माण सामग्रीमा चिप्लिएर मोटरसाइकल अनियन्त्रित भएर विपरीत दिशाबाट आउँदै गरेको बा प्र०३–००१ ख १५८६ नम्बरको ट्रकसँग ठोक्किएर दुर्घटना भएको प्रत्यक्षदर्शीको भनाइ छ । गम्भीर घाइते भएका उनको धुलिखेल अस्पतालमा मृत्यु भएको हो ।
बुधबार दिउँसो साढे ३ बजे अरनिको राजमार्गको धुलिखेल—३ स्थित मिराबेल चोकमा मिनी ट्रक र मोटरसाइकल ठोक्किँदा एक जनाको मृत्यु भयो । बनेपाबाट धुलिखेलतर्फ जाँदै गरेको रा७प ७२८८ नम्बरको मोटरसाइकल र बनेपातर्फ जाँदै गरेको बा२क २०१९ नम्बरको ट्रक ठोक्किँदा मोटरसाइकल चालक प्यूठानको प्यूठान–८ का २७ वर्षीय सुरज गिरी धुलिखेल अस्पतालमा उपचारका क्रममा मृत्यु भयो । साउन महिनामा मात्रै काभ्रेमा १४ वटा सवारी दुर्घटनामा ५ जनाको मृत्यु भएको छ । चार मोटरसाइकल चालक र एक टिपर चालकको मृत्यु भएको प्रहरीको भनाइ छ । मृतकहरु २० देखि ३० वर्ष उमेरका बढी छन् ।
यी दुर्घटनामा प्रमुख कारण सवारी चालकको लापरबाही देखिएको जिल्ला ट्राफिक प्रहरी प्रमुख प्रहरी निरीक्षक सुरेश थापाले बताए । सडकको गुणस्तर, चालकको लापरबाही र किनारमा जथाभावी राखिने सामग्रीले दुर्घटनाको मुख्य कारण देखिन्छ । साँगा–धुलिखेल खण्ड विस्तारका क्रममा अव्यवस्थित ढंगले राखिएका निर्माण सामग्रीलाई व्यवस्थित गराउन जिल्ला प्रशासन कार्यालयले निर्माण व्यवसायीलाई ध्यानाकर्षण गराएको छ । सडकमा निर्माण भइरहेको संकेत चिह्न र सावधानी अपाउनका लागि निर्देशनात्मक चिह्न पनि राखिएका छैनन् । जसले गर्दा सडकमा सवारी दुर्घटनाको जोखिम बढ्दै गएको सर्वसाधारणले गुनासो गरेका छन् ।
राजमार्गमा लगातार दुई दिन भएको सवारी दुर्घटना र मानवीय क्षति भएपछि मात्रै यस विषयमा प्रहरी र प्रशासनको ध्यान गएको छ । प्रमुख जिल्ला अधिकारी पुण्यविक्रम पौडेलले सडकमा निर्माण कार्य भइरहेको बारे सांकेतिक चिह्न र सावधानी अपाउनका लागि निर्देशनात्मक चिह्न राख्न व्यवसायीलाई निर्देशन दिइएको बताए । सडकमा भइरहेको निर्माण कारण मात्रै सवारी दुर्घटनाको प्रमुख कारण नभएको जिल्ला ट्राफिक प्रहरी कार्यालय काभ्रेका प्रमुख प्रहरी निरीक्षक सुरेश थापाले बताए । ‘काभ्रेमा भएका लगातारका दुई दुर्घटनामा एउटामा चालकको लापरबाही र अर्कोमा असवाधानीका कारण भएको देखिन्छ,’ उनले भने, ‘अधिकांश दुर्घटना चालकको लापरबाहीकै कारण भएको पाइएको छ, ट्राफिक नियमको पालना पनि गरिएको पाइँदैन ।’
