काठमाडौँ – काठमाडौँ महानगरपालिकाको कार्यपालिका बैठकमा पेश भएका प्रस्तावहरुमा छलफल हुँदा विवाद भएको छ।
बैठकमा पेश भएका २१ प्रस्तावमध्ये अन्तिममा रहेको विविध शीर्षकमा छलफल हुँदा विवाद भएको हो। वडाध्यक्षहरुले विविध शीर्षकको छलफल सुरु भएपछि विभागीय समितिले मागेको योजना बजेटमा नपरेको, वडाले माग्दै नमागेको बजेट वडामा दिएको भन्दै प्रश्न उठाएका थिए।
केही कार्यपालिका सदस्यहरुले महानगरकी उपप्रमुख सुनिता डंगोलको बजेट निर्माणमा भएको भूमिकाबारे प्रश्न गरेका थिए। उपप्रमुख डंगोलले बजेट आफू एक्लै बनाएको नभइ बजेट तर्जुमा समितिले बनाएको जवाफ दिएकी थिइन्।
विवाद बढ्दै गएपछि महानगरपालिकाले गर्दै आएको बैठकको लाइभ बन्द गरिएको थियो। सदस्य बोल्दा-बोल्दै लाइभ बन्द गरिएको हो।
काठमाडौँ महानगरपालिकाको पहिलो कार्यपालिका बैठकदेखि नै प्रत्यक्ष प्रशारण सुरु गरिएको थियो। मेयर बालेन शाहले चुनावी एजेण्डा नै कार्यपालिका बैठक लाइभ गर्नेलाई बनाएका थिए। जसअनुसार काठमाडौँ महानगरपालिकाको आधिकारिक फेसबुक पेज, युट्युब च्यानलबाट लाइभ गर्दै आएको थियो।
