काठमाडौं । जागिरको प्रलोभन देखाएर बंगलादेशदेखि नेपाल बोलाएर बन्धक बनाउँदै फिरौती उठाउने गरेको आरोपमा प्रहरीले सात जनालाई पक्राउ गरेको छ।
बन्धक बनाउँदै परिवारसँग फिरौती माग गर्ने समूहका सात जनालाई विभिन्न ठाउँबाट पक्राउ गरेर काठमाडौं उपत्यका अपराध अनुसन्धान कार्यालयले पक्राउ गरी आइतबार सार्वजनिक गरेको छ।
पक्राउ पर्नेहरूमा पाँच जना बंगलादेशी नागरिक छन् भने दुई जना नेपाली नागरिक छन्। बंगलादेशको गाजिपुरका ४७ वर्षीय अमिर हुसेन, बंगलादेशको कुमिल्लाका ३८ वर्षीय सलिम मिया, बंगलादेशकै बारिसालका ३७ वर्षीय एमडी मोसिउर रहमान, बंगलादेशकी २१ वर्षीय जहन्जिर आलम, बंगलादेश ढाकाका २१ वर्षीया थमिन बेगम छन्। त्यसैगरी नेपाली नागरिकहरू इलामको चालाचुलीका ३३ वर्षीया रोशनी राई र सिन्धुपाल्चोकको बलेफी–६ का २७ वर्षीया तारा नेपाली छन्।
बंगलादेशी नागरिककै योजनामा नेपाली युवती प्रयोग गरेर बंगलादेशीलाई काठमाडौं बोलाउने र बन्धक बनाएर फिरौती उठाउने गरेको पाइएपछि उनीहरूलाई पक्राउ गरिएको अपराध अनुसन्धान कार्यालयका एसएसपी डा मनोज केसीले जानकारी दिए।
यो समूहले वैदेशिक रोजगारीका नेपालबाट अन्य देश पठाउने भन्दै बोलाउने र काठमाडौं आएपछि सेफ हाउसमा बन्धक बनाएर रकम असुल्ने गरेको पाइएको छ। काठमाडौंमा बन्धक बनाएपछि बंगलादेशमा रहेका उनीहरूका आफन्तलाई फोन तथा भिडिओ कल गर्दै फिरौती रकम लिने गरेको पाइएको छ।
यसरी यो समूहले एक व्यक्तिको परिवारबाट १० लाख रुपैयाँसम्म फिरौती रकम लिएको पाइएको एसएसपी केसीले बताए। फिरौती नदिए ज्यान मार्नेसम्मको धम्की दिने गरेको पाइएको छ।
ज्यान मार्ने धम्की दिएपछि पीडितका परिवारको तर्फबाट शेख पनिरले हुसेन मोथासो कहम्राको खातामा पठाएका थिए। यसरी पटक पटक फोन गर्दै रकम माग गरेपछि अबु बक सिद्धिकी साउन २४ गते पर्यटक प्रहरी भृकुटिमण्डपमा पुगेका थिए।
पर्यटक प्रहरीमा यसबारे सूचना पुगेपछि यसको थप अनुसन्धान अपराध अनुसन्धान कार्यालयले गरेको थियो। जसक्रममा प्रहरीले ६ जनालाई पक्राउ गरेको हो।
यो समूहले बंगलादेशी नागरिकहरूलाई कालिमाटीमा रहेको मेमोरियल गेष्ट हाउसमा राखेको भन्ने सूचना आएपछि साउन २६ गते उक्त गेष्टहाउसमा सोधपुछ गर्दा बंगलादेशी नागरिक अमिर हुसेनले कोठा नम्बर ३१० र ३११ भाडामा लिएको खुलेको थियो।
जहाँ चार जना बंगलादेशी नागरिकलाई बन्धक बनाएर राखिएको पाइएको थियो। उनीहरूलाई उद्धार गर्नुका साथै बन्धक बनाएर राखेको आरोपमा दुई नेपाली युवतीसहित ६ जनालाई पक्राउ गरिएको एसएसपी केसीले बताए।
यो समूहले ललितपुरको हरिसिद्धमा समेत घर भाडामा लिएर बंगलादेशी नागरिकहरू बन्धक बनाएर राखेको पाइएकाले उनीहरूको समेत उद्धार गरिएको छ।
त्यसैगरी अर्की एक बंगलादेशी महिलालाई भने रोशनी राईले केटीसी ब्युटी पार्लर स्पाको नामका दर्ता गरी मसाज सेन्टरमा बन्धक बनाइ राखेको खुलेको प्रहरीले जनाएको छ।
पक्राउ परेका चार बंगलादेशी र दुई नेपाली गरी ६ जनालाई थप कारबाही तथा अनुसन्धानका लागि जिल्ला प्रहरी परिसर काठमाडौं पठाइएको छ। उनीहरूविरुद्ध मुलुकी अपराध संहिता २०७४ को दफा २११ र २१२ तथा संगठित अपराध निवारण ऐन २०७० बमोजिमको कसुरमा अनुसन्धान अघि बढाइएको छ।
