विराटनगर । बुढीगंगा गाउँपालिकाले सम्झौता नवीकरण नगरेपछि कामबाट निकालिएका करारका कर्मचारी आन्दोलनमा उत्रिएका छन् । करारमा कार्यरत कर्मचारीमध्ये २६ जनाको सम्झौता नवीकरण नभएपछि उनीहरु आन्दोलनमा उत्रिएका हुन् ।
उनीहरूले आफूहरूलाई पुर्नवहालीको माग राख्दै मंगलबारदेखि सुरु गरेका छन् । मंगलबार आन्दोलनमा उत्रिएका कर्मचारीले कार्यालयको गेटमा तालाबन्दी गरेर प्रदर्शन गरेका छन् । तालाबन्दीका कारण जनप्रतिनिधि, कर्मचारी तथा सेवाग्राही कार्यालयभित्र प्रवेश गर्न पाएनन् ।
आन्दोलनमा उत्रिएका कर्मचारीले गाउँपालिकाले विभेदपूर्ण तरिकाले कामबाट निकालेको भन्दै पुनर्बहालीको माग गरेका छन् । पालिकाले सब इन्जिनियर, अमिन, अहेब, कार्यालय सहायकलगायतलाई कामबाट निकालेको थियो ।गाउँपालिकामा ६४ जना करारका कर्मचारी छन् । पालिका उपाध्यक्ष अमृताकुमार गच्छदारले कर्मचारी बढी हुँदा बेरुजु धेरै आएका कारण कार्यपालिकाको बैठकबाटै निर्णय गरेर करारका २६ जनालाई विदा गरिएको बताइन् ।
