काठमाडौँ / नेकपा माओवादी केन्द्रका उपमहासचिव जनार्दन शर्माले पार्टीले अब माओवादी धारालाई विस्तारै समाजवादी धारामा रुपान्तरण गर्नुपर्ने प्रस्ताव गरेका छन् ।
‘माओवादी धारालाई अब विस्तारै समाजवादी धारामा रुपान्तरण गरी सोहीअनुसार हाम्रो सैद्धान्तिक मार्गनिर्देशन तयार गर्नुपर्छ,’ जारी केन्द्रीय समितिको बैठकमा शनिबार बोल्दै उपमहासचिव शर्माले भनेका छन् ।
उनले युद्ध, शान्ति, संविधान निर्माण र कार्यान्वयनका विषयमा भएका उपलब्धिहरुको समीक्षा गर्दै पुष्पलालदेखि पुष्पकमलसम्मका उपलब्धिको संश्लेषण जरुरी रहेको बताए । उनले समाजवादको आधार तय गर्न पार्टीले तत्काल विभिन्न चार विषयमा अभियान र छलफल थाल्नुपर्ने बताए ।
‘वामपन्थी तथा प्रगतिशील जनमतलाई केन्द्रित गरी उन्नत लोकतन्त्रको अभ्यास गर्नुपर्छ । भौगोलिक र पर्यावरणीय विविधता, जातीय विविधता, सांस्कृतिक विविधता, अपार प्राकृतिक साधन श्रोत, युवा बहुल जनसंख्या, श्रमयोग्य शक्तिको प्रचुरतालाई आधार बनाइ आर्थिक विकास, गरिबी अन्त्य, रोजगारी सिर्जना, आत्मनिर्भरताको लागि पहल गर्नुपर्छ,’ समाजवादको आधार तय गर्नेबारे उपमहासचिव शर्माले भनेका छन्, ‘सरकार, सदनबाट सुशासन र सामाजिक न्याय लक्षित कार्यक्रममार्फत जनजीवीकासँग सम्बन्धित समस्या समाधान गर्नुपर्छ र समाजमा विद्यमान विभिन्न विभेद र शोषणका विरुद्ध आम जनताको चेतना वृद्धि सहितको प्रतिरोधका रुपमा सामाजिक सांस्कृतिक रुपान्तरण अभियान सन्चालन गर्नुपर्छ ।’
उपमहासचिव शर्माले पार्टीलाई विधिसम्मत् चलाउनुपर्ने र पार्टीमा नेतृत्व चयनकालागि मनोनयनका सट्टा निर्वाचनको प्रक्रिया प्रारम्भ गर्ने व्यवस्था गर्न प्रस्ताव गरेका छन् । ‘पार्टीलाई विधिसम्मत चलाउन विधान नमिच्ने संकल्प गर्नुपर्छ । नेतृत्व चयनका लागि पार्टिभित्र मनोनयनको सट्टा निर्वाचनको प्रक्रिया प्रारम्भ गर्नुपर्छ । समावेशी प्रतिनिधित्वको लागि सम्बन्धित क्लष्टरमा निर्वाचन गर्नुपर्छ,’ उनले भने ।
उनले पार्टीमा अहिलेको पदाधिकारी र स्थायी समितिबाट कम्तीमा एक तिहाईले विभागीय काम र सल्लाहकारको जिम्मेवारी लिन तयार हुनुपर्ने बताएका छन् । ‘पार्टीभित्र आलोचना र आत्मालोचना गर्ने, लागेका कुरा छलफल गरा सही वा गलत के हो भन्ने कुरा स्पष्ट गर्ने, नेतृत्वले एक वा अर्कोलाई अविश्वास र आशंकाले होइन विश्वासका आधारमा व्यवहार गर्ने पद्दतिको विकास गर्नुपर्छ,’ उनको भनाइ छ ।
