भारतमा साम्प्रदायिक झडप, दिल्लीमा बढाइयो सुरक्षा सतर्कता (तस्बिरसहित)

आक्रोशित भिडले मंगलबार सबेरै एउटा मस्जिदमा आगजनी गर्नुका साथै मौलवीको हत्या गरेको छ । हिंसामाथि नियन्त्रणका लागि अर्धसैनिक बलको २० वटा टुकडी तैनाथ गरिएको भारतीय समाचारमाध्यमहरुले उल्लेख गरेका छन् । नुह, पलवल, मानेसर, सोहाना र पटौदीमा इन्टरनेट बन्द गरिएको छ । हरियाणमा जारी हिंसालाई ध्यानमा राख्दै उत्तर प्रदेशका ११ वटा जिल्लामा पनि सुरक्षा व्यवस्था चुस्त बनाइएको छ ।

दिल्लीबाट जम्मा ५० किलोमिटरको दूरीमा रहेको नुहमा हिन्दु संगठनले निकालेको ब्रजमण्डल यात्रामाथि सोमबार ढुंगा प्रहार गरिएपछि स्थिति तनावपूर्ण बनेको थियो । आक्रमणबाट जोगिन करिब २५ सय मानिसले नजिकैको मन्दिरमा शरण लिएका थिए ।

झडपले विस्तारै हिंसात्मक रुप लिएको थियो । दर्जनौं कारमा आगजनी गरिएको थियो भने प्रहरी बिटमा समेत आक्रमण भएको थियो । हिंसा रोक्न प्रहरीले गोली प्रहार गरेको थियो । नुहमा भएको हिंसामा सोमबार र मंगलबार गरी अहिलेसम्म ६ जनाले ज्यान गुमाइसकेका छन् । हिंसामा संलग्न भएको आशंकामा एक सयभन्दा बढी मानिसलाई नियन्त्रणमा लिइएको प्रहरीले जनाएको छ ।