काठमाडौँ– कांग्रेस पार्टी सभापति एवं पूर्व प्रधानमन्त्री शेरबहादुर देउवा पत्नी एवं कांग्रेस नेतृ आरजु राणा देउवाले आफ्नै पार्टीका केन्द्रीय सदस्यलाई धम्काएकी छन्।
मंगलबार अपरान्ह पार्टीको केन्द्रीय समिति बैठक सकिएपछि आरजुले केन्द्रीय सदस्य अजयबाबु शिवाकोटीलाई धम्काएकी हुन्।
नक्कली भुटानी शरणार्थी प्रकरणमा मनलाग्दी अभिव्यक्ति दिँदै हिँडेको भन्दै आरजुले धम्क्याएको सँगै रहेका एक नेताले बताए।
प्रत्यक्षदर्शीका अनुसार बैठक सकिएपछि बाहिरिने क्रममा एकले अर्कालाई अभिवादन गर्दैगर्दा आरजुले ‘अजयजी’ भन्दै बोलाएर बाहिर के बोल्दै हिँडेको भनेर प्रश्न गरिन्। अजयले मैले के बोलेँ र भनेर प्रतिप्रश्न गरेपछि ‘म प्रमाणसहित प्रस्तुत हुन्छु’ भनेर आरजुले अजयलाई ‘देखाइदिने’ धम्की दिएको प्रत्यक्षदर्शीले बताए।
यसबारे शिवाकोटीले पुष्टि गर्दै नक्कली भुटानी शरणार्थी प्रकरणको बिषयमा नेतृ राणाले धम्क्याएको बताए।
आरजुले धम्काएपछि केन्द्रीय समितिको बैठक कक्षबाट नेता उमेशजंग रायमाझीले शिवाकोटीलाई बाहिर लगेका थिए। घटना हुँदा नेता दिलेन्द्रप्रसाद बडु पनि सँगै रहेको प्रत्यक्षदर्शीले बताए। आरजुको धम्कीपछि सबै नेताहरुले मुखामुख गरेको बुझिएको छ।
नक्कली भुटानी शरणार्थी प्रकरणमा पार्टीका नेता बालकृष्ण खाँड थुनामा छन् भने आरजु पनि यस प्रकरणमा मुछिएकी छन्।
सोही प्रकरणमा कांग्रेस संस्थापन इतर समूहका पदाधिकारीदेखि नेतासम्मले पक्राउ परेका नेतालाई पार्टीबाट निलम्बनको माग गर्दै आएका छन्।
