संयुक्त राष्ट्रसंघीय बाल कोष (युनिसेफ)ले अफगानिस्तानका दुई लाख ७० हजारभन्दा बढी कुपोषित बालबालिकाको उपचार गरेको दाबी गरेको छ।
बितेका पाँच महिनामा कुपोषणको सिकार भएका दुई लाख ७३ हजार बालबालिकाको उपचार युनिसेफबाट भएको खामा प्रेसले जनाएको छ।
खामा प्रेसका अनुसार तालिबानले देशको शासन सम्हालेपछि गरिबीमा भएको वृद्धिले बालबालिका पनि कुपोषणको सिकार भएका सहायता संगठनहरूले बताएका छन्।
मानवीय सहायता संगठनहरूमाथिको प्रतिबन्धले त्यस्तो परिस्थिति उत्पन्न भएको हो।
अफगानिस्तानका लागि युनिसेफका प्रतिनिधि फ्रान इक्विजाले यो वर्ष देशका करिब २३ लाख बालबालिकाले कुपोषणको सामना गर्ने बताएका छन्।
उनीहरूलाई पोषक खाद्यपदार्थ उपलब्ध गराउन अन्तरराष्ट्रिय समुदायले सघाउनुपर्ने तथा तालिबान सरकारले सहायता निकायलाई शंकाको दृष्टिले नहेरी मानवीय सहायतामा क्रियाशील हुने वातावरण बनाउनुपर्ने उनकाे भनाइ छ।
