हरारे । स्कटल्यान्डमाथि अविश्वसनीय जित हात पार्दै नेदरल्यान्ड्स विश्वकप क्रिकेटका लागि छनोट भएको छ । नेदरल्यान्ड्सले बिहीबार जिम्बावेमा भइरहेको विश्वकप छनोटमा स्कटल्यान्डमाथि ४ विकेटको विजय हात पार्यो । नेदरल्यान्ड्स पाँचौं पटक विश्वकपमा छनोट भएको हो । विश्वकप यस वर्ष भारतमा हुँदै छ ।
सन् २०११ यता भने नेदरल्यान्ड्स पहिलो पटक विश्वकपमा पुगेको हो । विश्वकपमा १० राष्ट्रमात्र खेलाउने निर्णय गरेयता नेदरल्यान्ड्स एसोसिएट राष्ट्रबाट क्रिकेटको सर्वोच्च प्रतियोगितामा छनोट हुने पहिलो राष्ट्र हो । पछिल्लो खेलमा जिम्बावेलाई पराजित गरेपछि स्कटल्यान्डको विश्वकपमा पुग्ने सम्भावना उच्च बनेको थियो । तर, निर्णायक खेलमा टोली पुनः एकपटक असफल रह्यो ।
सुपर सिक्सको निर्णायक खेलमा नेदरल्यान्ड्सले टस जितेपछि ब्याटिङ निम्तो पाएको स्कटल्यान्डले हरारेमा निर्धारित ५० ओभरमा ९ विकेट गुमाई २ सय ७७ रन बनायो । ब्रेन्डन म्याकमुलनले सानदार १ सय ६ रन बनाए । उनले ११० बल खेल्दै ११ चौका र ३ छक्का प्रहार गरे । कप्तान रिचर्ड बेरिङटनले ८४ बलमा ३ चौका र २ छक्कासहित ६४ तथा टोमस म्याकिन्टोसले २८ बलमा ३८ रन बनाए ।
नेदरल्यान्ड्सले विश्वकपमा पुग्न यो स्कोर ४४ ओभरभित्र पूरा गरिसक्नुपर्ने थियो । स्कटल्यान्डको हकमा विजय हात पारेमा मात्र पनि टोली विश्वकपमा पुग्ने थियो । बलिङमा ५ विकेट लिएका बास डे लिडले १ सय २३ रनको सानदार इनिङ्स खेलेपछि नेदरल्यान्ड्सले ४२।५ ओभरमै लक्ष्य पूरा गर्यो । उनले ९२ बल खेल्दै ७ चौका र ५ छक्का प्रहार गरे । एकदिवसीय अन्तर्राष्ट्रियको एकै खेलमा ५ विकेट र शतक बनाउने उनी पाँचौं खेलाडी हुन् ।
नेदरल्यान्ड्सका भिभ रिचर्डसले सन् १९८७ मा न्युजिल्यान्डविरुद्ध, इंग्ल्यान्डका पाउल कोलिनउडले सन् २००५ मा बंगलादेशविरुद्ध, यूएईका रोहन मुस्तफाले सन् २०१७ मा पपुवा न्यु गिनीविरुद्ध र सोही वर्ष आयरल्यान्डका पाउल स्टर्लिङले अफगानिस्तानविरुद्ध एकै खेलमा ५ विकेट लिनुका साथै शतक पनि बनाएका थिए । ५ विकेट लिएर शतक बनाएको खेलमा डी लिडले बनाएको रन सबैभन्दा बढी हो ।
नेदरल्यान्ड्स, स्कटल्यान्ड र जिम्बावेको समान ६–६ अंक भए पनि नेट रनरेटमा डच टोली अगाडि रह्यो । श्रीलंका यसअघि नै ८ अंक जोडेर शीर्षस्थानमा रहँदै विश्वकपमा पुगिसकेको छ । १० टोली सहभागी छनोट प्रतियोगिताको शीर्ष दुई टोलीले भारतमा अक्टोबर–नोभेम्बरमा हुने विश्वकपमा छनोट हुने प्रावधान थियो । नेदरल्यान्ड्स र श्रीलंकाले आइतबार उपाधिका लागि खेल्नेछन् ।
स्कटल्यान्डले जिम्बावेसहित आयरल्यान्ड र वेस्ट इन्डिज गरी तीन टेस्ट राष्ट्रलाई पराजित गरे पनि विश्वकपमा पुग्न त्यो पर्याप्त भएन । समूह चरणको अन्तिम खेलमा बाजी मार्नु नै नेदरल्यान्ड्सको विश्वकप प्रवेश गर्नुको प्रमुख कारण बन्यो । उक्त खेलमा वेस्ट इन्डिजले ३७४–६ को स्कोर बनाएको थियो । नेदरल्यान्ड्सले पनि ३ सय ७४ रन नै बनाएपछि खेलमा सुपर ओभरमा गएको थियो । त्यसमा विजय हात पात पार्दै नेदरल्यान्ड्सले सुपर सिक्सका लागि महत्त्वपूर्ण २ अंक जोडेको थियो ।
श्रीलंकासँग २ सय १४ रनको लक्ष्य पूरा गर्न नसके पनि नेदरल्यान्ड्सले त्यसपछिका खेलमा क्रमशः ओमान र स्कटल्यान्डलाई पराजित गर्दै उत्कृष्ट पुनरागमन गरेको हो । सन् २०१४ को विश्वकप छनोटमा सुपर सिक्समै पुग्न नसकेपछि नेदरल्यान्ड्सको क्रिकेट संकटमा परेको थियो । यसपालि पनि काउन्टी क्रिकेटको प्रतिवद्धताका कारण प्रमुख ७ खेलाडीविनै नेदरल्यान्ड्स विश्वकप छनोट खेल्न जिम्बावे पुगेको थियो ।
