काठमाडाैं । नेकपा एमालेका सांसद देवीप्रकाश भट्टचनले ललितपुरको गोदावरीदेखि काठमाडौंको बुढानीलकण्ठ तथा काठमाडौंको थानकोटदेखि भक्तपुरसम्म मेट्रो रेल सञ्चालनका लागि बजेट व्यवस्था गर्न माग गरेका छन् ।
नेपालका एक प्रतिष्ठित व्यवसायी समेत रहेका भट्टचनले थानकोट–चित्लाङ सुरुङमार्गको काम अगाडि बढाएमा काठमाडौं उपत्यकाको जनसंख्याको चाप कम हुने सुझाव समेत दिए ।
सांसद भट्टचनले सरकारले अगाडि सारेको नयाँ अवधारणालाई हावादारी भन्न नमिल्ने बताए ।
कलकत्ता बन्दरगाहमा आउन सक्ने पानीजहाज सञ्चालनमा ल्याउन सकेमा मलेसिया र सिंगापुरबाट हुने ढुवानीका लागि २ अर्ब विदेशी मुद्रा बचत हुने उनको भनाइ छ ।
‘ढोरपाटन एकीकृत गुरुयोजनाका लागि प्रधानमन्त्रीसमक्ष निवेदन गरेका छौं, यसलाई अगाडि बढाउन जरुरी छ,’ उनले भने ।
साथै जलाशययुक्त उत्तरगंगा आयोजनालाई अगाडि बढाउन पनि उनले सरकारको ध्यानाकर्षण गराए ।
संसद्मा सम्बोधनका क्रममा सांसद भट्टचनले अन्य दुई गम्भीर विषयमा समेत सरकारको ध्यानाकर्षण गराएका छन् ।
‘मुस्ताङमा खम्पा विद्रोह उठेपछि हिमाली क्षेत्रका १३ जिल्लामा हेलिकप्टर सेवा सञ्चालन नभएको अवस्था छ । नेपालीलाई नेपालमा जाँदा पनि गृह मन्त्रालय र नागरिक उड्यन प्राधिकरणको सिफारिश तथा जिल्ला प्रशासनको अनुमति लिनुपर्ने आवश्यकता छ । पहाडी क्षेत्रमा हेलिकप्टर सेवा सञ्चालनका लागि सहजीकरण गर्न जरुरी छ,’ भट्टचनले भने ।
सांसद भट्टचनले अहिलेको मिश्रित निर्वाचन प्रणालीका कारण भविष्यमा संवैधानिक संकट आउन सक्नेतर्फ पनि सचेत गराएका छन् ।
‘मैले यसअघि पनि संसदको शून्य समयमा यो कुरा बोलिसकेको छु । मिश्रित निर्वाचन प्रणालीका कारण देशमा ढिलोचाँडो संवैधानिक संकट आउने छ । अर्को निर्वाचन हुनुभन्दा केही महिनाअगाडि छलफल गरेर एउटा निष्कर्षमा पुग्नुपर्छ,’ भट्टचनले संसदमा भने ।