काठमाडौं । राष्ट्रिय स्वतन्त्र पार्टीका सभापति रवि लामिछानेले नक्कली भुटानी शरणार्थी बनाउने प्रकरणमा सरकारले आफूलाई पुग्नेमात्र तान्छ कि अरु पनि अनुसन्धान गर्छ हेर्नुपर्ने टिप्पणी गरे।
सरकारबारे निर्णय गर्न बसेको बैठकपछि पत्रकारसँग कुरा गर्दै लामिछानेले सरकारको छानबिन सकारात्मक भएको तर सँगै आशंका पनि रहेको जनाए।
रास्वपाले सरकारलाई दिएको समर्थन भने फिर्ता लिएको छ। योसँगै रास्वपा सरकारमा नगइ प्रतिपक्षमा बस्ने भएको छ। ‘यो प्रकरण कसरी टुंगिन्छ भन्ने अझै हेर्न बाँकी छ’, लामिछानेले भने, ‘सरकारले गरेको छानबिनमा हामी सकारात्मक छौं, गृहमन्त्रीले राम्रो कदम चाल्नुभएको छ।’
उनले अझै केही राजनीतिक मानिस पक्राउ नपरेकाले आशंका रहेको बताए। ‘जति तान्दा पुग्छ, त्यति मात्रै जाने हो कि’, लामिछानेले भने, ‘आगामी दिन हेर्दै जाउँ।’ नक्कली शरणार्थी प्रकरणमा तानिएका पूर्व उपप्रधानमन्त्री टोपबहादुर रायमाझी पक्राउ नपरेकाले यो प्रकरण शंकाकै घेरामा रहेको उनको टिप्पणी थियो।
