अन्तर्राष्ट्रिय मुद्रा कोष (आइएमएफ) ले आर्थिक संकटको सामना गरिरहेको श्रीलंकाका लागि ३ अर्ब डलरको बेलआउट प्याकेज स्वीकृत गरेको छ।
करिब एक वर्षदेखि यो सम्झौताको चर्चा चलिरहेको थियो।
श्रीलंकाका राष्ट्रपति रनिल विक्रमासिंघेले बेलआउट प्याकेज स्वीकृत गरेकोमा आईएमएफलाई धन्यवाद दिएका छन्। उनले ट्वीटमा भनेका छन्, ‘आइएमएफको यो प्याकेज देशको ऋण घटाउन र सुधारवादी एजेन्डा हासिल गर्न निकै महत्त्वपूर्ण छ।’
श्रीलंकाका विदेशमन्त्री अली साबरीले सरकारी कम्पनीहरूको पुनर्संरचना र राष्ट्रिय वायुसेवाको निजीकरण गरेर थप रकम जुटाइने बिबिसीलाई बताए।
यद्यपि, विज्ञहरूले चेतावनी दिएका छन् कि श्रीलंकाको अगाडि अझै कठिन बाटो छ।
श्रीलंकाको अर्थतन्त्र कोरोना महामारी, ऊर्जाको बढ्दो मूल्य, जनवादी कर कटौती र ५० प्रतिशतभन्दा बढीको मुद्रास्फीति दरका कारण नराम्ररी प्रभावित भएको छ।
वर्षको सुरुमा श्रीलंकाले तलब पाउने मानिसहरूको लागि कर दर १२.५% बाट बढाएर ३६% गरेको थियो। यससँगै इन्धन, खाद्यान्नजस्ता अत्यावश्यक खरिदमा पनि कर बढाइएको छ।
