काठमाडाैं । आइसीसी विश्वकप लिग २ त्रिकोणात्मक एक दिवसीय सिरिजअन्तर्गत घरेलु मैदानमा जारी खेलमा नेपालले यूएईसामु २ सय ४९ रनको लक्ष्य दिएको छ।
कीर्तिपुरस्थित त्रिवि क्रिकेट मैदानमा टस जितेर ब्याटिङ गरेको नेपाल ४९.२ ओभरमा २ सय ४८ रन बनाउँदा अलआउट भयो। पावर प्लेमा खराब सुरुवात गरेको नेपालले ७.१ ओभरमा ३ विकेट गुमाएर २२ रनको अवस्थामा थियो।
नेपालले दुवै ओपनर र तेस्रो क्रममा खेलाडीलाई पनि दोहोरो अंक नजोड्दै गुमाएपछि दबाबमा परेको थियो।
चौथो विकेटका लागि कप्तान रोहित पौडेल र भीम सार्कीले ५४ रनको साझेदारी गर्दै नेपालको इनिङस् सम्हाले। ३७ बलमा चार चौका हान्दै भीम २९ रनमा क्याच आउट हुन पुगे। उता रोहितले ७७ रनको कप्तानी पारी खेलेका थिए।
