काठमाडौँ– राष्ट्रपति निर्वाचनमा राष्ट्रिय प्रजातन्त्र पार्टी राप्रपा तटस्थ बस्ने भएको छ। बिहीबार हुने राष्ट्रपति निर्वाचनमा राप्रपाका संघीय तथा प्रदेश सभाका सांसदहरु मतदान प्रक्रियाबाट बाहिर हुनेछन्। पार्टीको बुधबार बसेको केन्द्रीय कार्यसम्पादन समितिको बैठकले बिहीबार हुने राष्ट्रपतिको निर्वाचनमा राप्रपा तटस्थ बस्ने निर्णय गरेको पार्टीका प्रवक्ता एवं प्रतिनिधिसभा सांसद ज्ञानेन्द्र शाहीले देश सञ्चारलाई जानकारी दिए।
प्रधानमन्त्री पुष्पकमल दाहालको पछिल्लो कदमसँग रुष्ट भएर राप्रपा फागुन १३ गते सरकारलाई दिएको समर्थन फिर्ता लिँदै सरकारबाट बाहिरिएको थियो। राष्ट्रपति मनोनयनमा समर्थक र प्रस्तावक दुवै नबसेको राप्रपाले राष्ट्रपतिको चुनाव पनि बहिस्कार गर्ने बताउँदै आएको थियो। राप्रपाको संघमा १४ र प्रदेशमा २८ सांसद छन्। पार्टीको जम्मा २४ सय ५० मतभार छ। राष्ट्रपति निर्वाचनमा आठ दलीय गठबन्धनबाट नेपाली कांग्रेसका नेता रामचन्द्र पौडेल र नेकपा एमालेबाट उपाध्यक्ष सुवासचन्द्र नेम्वाङ उम्मेदवार रहेका छन्।
राष्ट्रपतिका दुवै उम्मेदवारले राप्रपाको कार्यालयमा पुगेर अध्यक्ष राजेन्द्र लिङ्देनसहित अधिकांश पदाधिकारीसँग भेटेर मत मागेका थिए। राष्ट्रपति निर्वाचनको पूर्वसन्ध्यामा राप्रपाले राष्ट्रपति चुनावमा कसैलाई मतदान नगर्ने निर्णय गरेको छ। उक्त निर्णय पार्टीमा सर्वसम्मत रुपमै भएको प्रवक्ता शाहीले बताए।
