काठमाडौं । राष्ट्रपति निर्वाचनको मतदान सम्पन्न भएको छ। बिहान १० बजेदेखि सुरु भएको मतदान दिउँसो ३ बजे सकिएको हो।
नयाँ बानेश्वरस्थित संसद भवनमा रहेको मतदानस्थल पुगेर संघीय र प्रदेश सांसदहरुले राष्ट्रपति निर्वाचनमा मतदान गरेका हुन्।
राष्ट्रपतिमा नेपाली कांग्रेसका वरिष्ठ नेता रामचन्द्र पौडेल ८ दलीय गठबन्धनका साझा उम्मेदवार रहेका छन् भने नेकपा एमालेका तर्फबाट सुवासचन्द्र नेम्वाङ उम्मेदवार छन्। संघीय संसदका ३१३ र प्रदेशसभाका ५१८ सांसदले मत खसालेको निर्वाचन आयोगले जनाएको छ। राष्ट्रपतिको निर्वाचनमा संघीय संसद प्रतिनिधिसभा र राष्ट्रियसभाका ३३४ जना र प्रदेशसभाका ५५० जना सांसद मतदाता रहन्छन्।
संघीय सांसदको मतभार ७९ र प्रदेश सांसदको मतभार ४८ रहने व्यवस्था छ। निर्वाचनमा राष्ट्रिय प्रजातन्त्र पार्टी (राप्रपा)का १४ संघीय सांसद र २८ प्रदेश सांसद, नेपाल मजदूर किसान पार्टी (नेमकिपा)का एक संघीय सांसद र ३ प्रदेश सांसद भने मतदानमा सहभागी भएनन्। राप्रपा र नेमकिपाले राष्ट्रपति निर्वाचनमा सहभागी नहुने निर्णय गरेका थिए। यस्तै, निर्वाचनमा जसपाका एक जना प्रदेश सांसदको मत खसेन। निर्वाचन आयोगले मतपरिणाम आजै सार्वजनिक गर्ने जानकारी दिएको छ। अहिले अपराह्न ४ बजेबाट मतगणना सुरु हुनेछ।
