काठमाडौँ – नेकपा (एकीकृत समाजवादी)ले पूर्वराजा ज्ञानेन्द्र शाहले फागुन ७ गते प्रजातन्त्र दिवसको अवसरमा दिएको वक्तव्यको भर्त्सना गरेको छ।
एकीकृत समाजवादीका अध्यक्ष माधवकुमार नेपालले सोमबार वक्तव्य जारी गरेर पूर्वराजा शाहले गणतान्त्रिक व्यवस्था र राजनीतिक दलहरुप्रति लाञ्छना लगाउनु आपत्तिजनक रहेको बताएका हुन्।
‘नेपालमा जनक्रान्तिद्वारा राजतन्त्रको अन्त्य गरिसकिएको र अहिले कोही पनि ”श्री ५ महाराजधिराज” नरहेको तथा सम्पूर्ण नेपाली सामान्य नागरिक भइसकेको व्यवहोरा सर्वबिदितै छ,’ अध्यक्ष नेपालले भनेका छन्,’उक्त वक्तव्यमा गणतान्त्रिक व्यवस्था र राजनीतिक दलहरुप्रति जसरी लाञ्छना लाइएको छ, त्यो आपत्तिजनक छ।’
विगतमा राजतन्त्रले पटक–पटक जनताका अधिकारमाथि धावा बोलेको प्रसंगलाई ढाकछोप गरेर गणतान्त्रिक व्यवस्थाविरुद्ध बोल्नु गलत सरासर गलत भएको नेपालले उल्लेख गरेका छन्। पूर्वराजा शाहको वक्तव्यले अग्रगमन चाहनेहरुलाई गम्भीर बनाएको नेपालको भनाइ छ।
‘यसले मुलुकको अग्रगमन र प्रगति चाहनेहरुलाई गम्भीर र चिन्तित बनाउनु स्वाभाविक हो। अतः सबै लोकतान्त्रिक गणतान्त्रवादी शक्ति र व्यक्तिहरु यस खाले गतिविधिविरुद्ध एकजुट भएर प्रतिवाद गर्न हाम्रो पार्टी हार्दिक आह्वान गर्दछ,’ अध्यक्ष नेपालद्वारा जारी वक्तव्यमा भनिएको छ।
यो पनिः अहिलेको राज्य व्यवस्थाले जनताको सुख र समृद्धिमा योगदान दिन सकेनः पूर्वराजा शाह
पूर्वराजा शाहले प्रजातन्त्र दिवसको अवसरमा शुभकामना वक्तव्य जारी गर्दै अहिलेको राज्य व्यवस्थाले जनताको सुख र समृद्धिमा योगदान दिन नसकेको बताएका थिए। राजनीतिक दलका नेताहरु देश र जनताको हितभन्दा पनि दलगत, पारिवारिक र व्यक्तिगत रुपमा लोभ र लालचको जञ्जालमा फसेको पूर्वराजा शाहको भनाइ थियो।
