काठमाडौँ – ‘जनयुद्ध दिवस’मा बिदा दिइएकोप्रति सत्ता घटक दुई दलले असहमति जनाएका छन्। सरकारको चौथो ठूलो दल राप्रपाका मन्त्रीहरुले आकस्मिक रुपमा बोलाइएको मन्त्रिपरिषद् बैठक नै बहिस्कार गरेर बिदाप्रति विरोध जनाएको हो भने एमालेले पनि त्यसप्रति असन्तुष्टि जनाएको छ। एमाले र राप्रपाको विरोधसँगै जनयुद्ध दिवसमा बिदा दिने प्रकरणले प्रधानमन्त्री पुष्पकमल दाहाल ‘प्रचण्ड’ एक्लिएका छन्। आइतबार दिउँसो बोलाइएको मन्त्रिपरिषद्को आकस्मिक बैठकले भोलि (फागुन १ गते) सार्वजनिक बिदा दिने निर्णय गरेको थियो। बैठकको कार्यसूची थाहा पाएपछि राप्रपाबाट सरकारमा सहभागी उर्जामन्त्री राजेन्द्र लिङ्देन, शहरी विकासमन्त्री विक्रम पाण्डे, र कानुनमन्त्री धुव्रबहादुर प्रधानले मन्त्रिरिषद्को बैठक नै बहिस्कार गरेका थिए। राप्रपाले कुनै दल विशेषले सुरु गरेको हिंसात्मक आन्दोलनलाई समर्थन हुने गरी जनताका काम कारबाही नै रोकेर सार्वजनिक बिदा दिनु ठीक नभएको जनाएको छ। त्यस्तै, सत्ता गठबन्धनको सबैभन्दा ठूलो दल एमालेले पनि बिदाप्रति विरोध जनाएको छ। एमालेबाट सरकारमा सहभागी एक मन्त्रीले मन्त्रिपरिषद् बैठकमा बिदा दिने प्रस्तावको विरोध जनाएको स्रोतले बतायो। स्वास्थ्य मन्त्री पदम गिरीले बिदाको सङ्ख्या बढीको भएको अवस्थामा जनतालाई मार पर्ने गरी बिदा दिन नहुने सुझाव मन्त्रिपरिषद् बैठकमा राखेको एमाले स्रोतले बतायो। आइतबार बिहान बालुवाटारमा बसेको सत्ता साझेदार दलहरुको बैठकमा सोमबार बिदा दिनेबारे कुनै छलफल भएको थिएन। बिहान छलफल गरेर अघि बढ्ने तथा गठबन्धनलाई मजबुत बनाउने निर्णय गरेर उठेका सत्ता साझेदार दलबीच साँझ नपर्दै बिदाको विषयले खटपट देखिएको छ। छलफलबिनै बिदा दिइएको भन्दै एमालेले सोमबार थप विरोध गर्ने तयारी गरेको छ। तर विरोधको स्वरुपबारे केही बताइएको छैन। हिंसात्मक आन्दोलन सुरु भएको दिनलाई स्मरण गर्दै बिदा दिइएकोमा सर्वसाधरणले पनि असन्तुष्टि जनाएका छन्। सामाजिक सञ्जालमा बिदाको विरोध सुरु भएको छ। संविधानविद् भीमार्जुन आचार्यले बिदा दिने निर्णयले कार्यकारी अधिकारको दुरुपयोग गरेको टिप्पणी गरेका छन्। उनले सत्ता साझेदार दलबाटै यसको विरोध हुनुपर्ने ट्वीटमा उल्लेख गरेका छन्। आचार्यले भनेका छन्, ‘यो त कार्यकारी शक्तिको अधिक दुरूपयोग (excessive abuse) र स्वेच्छाचारी काम भयो। सशस्त्र द्वन्द्व एउटा सभ्य समाज र कानूनी राज्यमा कहिल्यै दिवस हुन सक्दैन। अब द्वन्द्वपीडितले न्याय पाउँछन् भन्ने पनि केही रहेन। यतिबेला सत्ता गठबन्धनका अरू घटकहरू कहाँ छन्, त्यो जान्न मन लाग्यो!’
