काठमाडौं– कांग्रेस नेतृत्वको तत्कालीन सत्ता गठबन्धन भत्किनुमा नेकपा एकीकृत समाजवादीका अध्यक्ष माधवकुमार नेपालले चार कारण प्रस्तुत गरेका छन्। शनिबारदेखि सुरु पार्टीको केन्द्रीय कमिटी बैठकमा प्रस्तुत २४ पृष्ठको राजनीतिक प्रतिवेदनमा अध्यक्ष नेपालले गत पुस १० गते भत्किएको सत्ता गठबन्धनका लागि कांग्रेस, केपी शर्मा ओली र माओवादी केन्द्रलाई आधार मानेर कारण प्रस्तुत गरेका हुन्। अध्यक्ष नेपालले प्रस्ततु गरेका चार कारण यसप्रकार छन्- १. निर्वाचनबाट ठूलो दल बनेपछि नेपाली कांग्रेसमा शक्तिको घमण्ड बढ्नु। २. नेपाली कांग्रेससँग सही सूचना नहुनु र उसले गलत सूचनामा विश्वास गर्नु। ३. केपी ओलीले उपर्युक्त वाम-लोकतान्त्रिक गठबन्धनलाई जसरी पनि तोडिछाड्ने उद्देश्य राखेर चालबाजीपूर्ण कदम चाल्नु। NIMB IME ४. माओवादी केन्द्रको सत्ताकेन्द्रित सोच र आफूलाई लाभ हुने भएपछि विचार नीति, सिद्धान्त, दृष्टिकोण र सहयात्री साथीहरु सबै त्यागेर हिँड्ने प्रवृत्ति। अध्यक्ष नेपालले निर्वाचनपछि वाम-लोकतान्त्रिक गठबन्धनकै सरकार बन्नुपर्दथ्यो भनेका छन्। तर नेपाली कांग्रेसका सभापति शेरबहादुर देउवा र माओवादी केन्द्रका अध्यक्ष पुष्पकमल दाहाल प्रचण्ड दुवैले आफू पहिले प्रधानमन्त्री बन्नुपर्ने अडान लिएको र एक पटक वचन दिइसकेका शेरबहादुर देउवा प्रचण्डलाई प्रधानमन्त्री बनाउन तयार नभएपछि प्रचण्ड अप्रत्याशित रुपमा एमालेसहितका दलहरुसँग गठबन्धन गरी प्रधानमन्त्री बन्न गएकाले निर्वाचनका बेला कायम रहेको वाम-लोकतान्त्रिक गठबन्धन भंग भएको नेपालले उल्लेख गरेका छन्। एमाले नेतृत्वको अहिलेको सत्ता गठबन्धनलाई अध्यक्ष नेपालले खिचडी प्रकृतिको भनेका छन्। ‘यसमा संविधानको पालना नगर्ने एमाले, गणतन्त्रको पक्षधर माओवादी केन्द्र र गणतन्त्रको विरोधी एवं हिन्दूराज्य र राजतन्त्र पुनःस्थापना गर्न चाहने राप्रपा, संघीयताको पक्षधर जसपा र संघीयता विरोधी राप्रपा एवं रास्वपा, जातीय पहिचानवादी नाउपा र पृथकतावादी पृष्ठभूमिको जनमत पार्टी एकै ठाउँमा रहेका छन्’, प्रतिवेदनमा उनले लेखेका छन्।
