काठमाडौँ – प्रधानमन्त्री पुष्पकमल दाहाल ‘प्रचण्ड’ले संवैधानिक पदहरुमा सहमति कायम गर्न प्रस्ताव गरेका छन्।
प्रधानमन्त्री निवास बालुवाटारमा बसेको सर्वदलीय बैठकमा दाहालले मन्त्रिपरिषद्को सन्दर्भमा आफू सत्ता साझेदार दलहरुबीच भएको समझदारीअनुसार अघि बढ्न तयार रहेको जनाउँदै संवैधानिक पदमा सहमति कायम गर्न प्रस्ताव गरेका छन्।
प्रधानमन्त्रीले सर्वदलीय बैठकमा भने, ‘सरकारका सन्दर्भमा सत्ता साझेदार दलबीचको सहमति नै लागू हुन्छ। अब संवैधानिक पदहरूको निर्वाचनमा सहमतिका साथ अगाडि बढ्न सकिन्छ वा सकिँदैन? तपाईंहरुले आफ्नो सुझाव दिनुहोस्।’
उनले आफू सत्ता साझेदार दलहरूसँग गरिएको समझदारीमा दृढ रहेको र सोहीअनुसार नै मंगलबार मन्त्रिपरिषद्ले पूर्णता पाएको बताए। दाहालले राष्ट्रपति, उपराष्ट्रपति, सभामुख, उपसभामुखजस्ता पदमा कांग्रेससहित दललाई समेट्ने प्रस्ताव गरेका हुन्।
सत्ता गठबन्धनमा राष्ट्रपति र सभामुख एमालेको भागमा परेको दाबी सार्वजनिक भइरहेका बेला दाहालले सबै दलको सहमतिमा अघि बढ्न सकिने सम्भावनाको खोजी गर्दै कांग्रेसलाई पनि विश्वासमा लिने कोशिस गरेका हुन्। राष्ट्रपतिमा कांग्रेसलाई सघाउन आश्वासन दिएपछि उसले दाहाललाई पुस २६ गते विश्वासको मत दिएको थियो।
बैठकमा दाहालले संवैधानिक पदहरूमा सहमति जुट्ने परिस्थितिमा आफूले त्यसको सहजीकरण गर्ने धारणा राखेको उनको सचिवालयले जानकारी दियो।
बैठकमा प्रधानमन्त्री प्रचण्डले आफूलाई विश्वासको मत दिएकोमा सबै दलहरूलाई धन्यवाद दिएका थिए।
उनले सरकारलाई दिएको विश्वासको मतलाई सम्मान गर्नु र सबैलाई मिलाएर अघि बढ्नु आफ्नो जिम्मेवारी भएको बताउँदै प्रतिपक्षले पनि सरकारलाई विश्वासको मत दिने परिस्थिति मौलिक भएको र त्यसले राष्ट्रिय सहमतिको सन्देश दिएको उल्लेख गरे।
बैठकमा प्रधानमन्त्री प्रचण्ड, नेपाली कांग्रेसबाट सभापति शेरबहादुर देउवा, उपसभापति पूर्णबहादुर खड्का, रामचन्द्र पौडेल, रमेश लेखक, नेकपा एमालेबाट अध्यक्ष केपी शर्मा ओली, ईश्वर पोखरेल र शंकर पोखरेल सहभागी थिए।
यस्तै, एकीकृत समाजवादीबाट माधव नेपाल, नेपाल समाजवादी पार्टीका बाबुराम भट्टराई, राष्ट्रिय स्वतन्त्र पार्टीबाट सभापति रवि लामिछाने, नागरिक उन्मुक्ति पार्टीकी अध्यक्ष रञ्जिता श्रेष्ठ, जनमत पार्टीबाट अब्दुल खान, स्वतन्त्र सांसद अमरेशकुमार सिंहलगायत उपस्थित थिए।
