काठमाडौं । चीर प्रतिद्वन्द्वी रियल मड्रिडमाथि सहज जितसँगै बार्सिलोनाले स्पेनिस सुपर कपको उपाधि उचालेको छ । क्लबका पूर्वमहान खेलाडी जाभीले प्रशिक्षक संहालेयता बार्सिलोनाले पहिलो उपाधि जितेको हो
। साउदी अरबमा खेलिएको यो एल क्लासिकोमा ला लिगा लिडर बार्सिनोलाले रियललाई दबाबमा राखेको थियो । १८ वर्षीय गाभीले रोवर्ट लेवान्डोस्कीको पासमा गोल गरेपछि ३३औं मिनेटमा बार्सिलोनाले अग्रता बनाएको हो ।
पहिलो हाफ सकिनु केही मिनेटअघि गाभीको पासमा लेवान्डोस्कीले गोल गरी अग्रता बढाए । दोस्रो हाफमा पेड्रीले गरेको गोलका लागि पनि गाभीले नै बल उपलब्ध गराएका थिए । रियल मड्रिडका लागि करिम बेन्जेमाले इन्जुरी समयमा सान्त्वना गोल फर्काए ।
