दाङ– लुम्बिनी प्रदेशका मुख्यमन्त्री लिला गिरीले भोलि बिहीबार पद तथा गोपनीयताको सपथ लिने भएका छन् । प्रदेश प्रमुखको कार्यालयले लुम्बिनी प्रदेश सभा परिसर राप्ती उपत्यका देउखुरीमा दिउँसो १ बजे पद तथा गोपनीयताको सपथ ग्रहण समारोह राखेको छ ।
नेपालको संविधान धारा १७२ बमोजिम मुख्यमन्त्री र मन्त्रीले प्रदेश प्रमुख समक्ष तथा राज्यमन्त्री र सहायक मन्त्रीले मुख्यमन्त्री समक्ष आफ्नो कार्यभार सम्हाल्नु अघि प्रदेश कानुन बमोजिम पद तथा गोपनियताको शपथ लिनुपर्ने उल्लेख छ । बुधवार प्रदेश प्रमुख अमिक शेरचनले नेपालको संविधानको धारा १६८ को उपधारा(२) बमोजिम एमाले संसदीय दलका नेता गिरीलाई मुख्यमन्त्रीमा नियुक्त गरे ।
एमालेबाट भूमिश्वर ढकाल र माओवादीबाट संसदीय दलका नेता जोखबहादुर महरा मन्त्री बन्ने पक्कापक्कीजस्तै भएको बैठकमा सहभागी एक प्रदेश सभा सदस्यले बताए । तर, माओवादी भित्र सरकारमा सहभागी हुन सबैजसो प्रदेश सभा सदस्य आकांक्षी छन् । यसले गर्दा आन्तरिक रुपमा व्यवस्थापन गर्न जटिल बन्न थालेको छ । एमाले र अन्य दल भित्र पनि यस्तै आकांक्षीको लिस्ट लामै छ ।
भूमिश्वर ढकालले भौतिक पूर्वाधार र जोखबहादुर महराले अर्थ अथवा आन्तरिक मामिला मन्त्रालय मध्य एउटा मन्त्रालयको जिम्मेवारी पाउने छन् । महराले अर्थमन्त्रालय पाउनुपर्ने दावी छ । माओवादीमा दोस्रो कार्यकालमा समेत निर्वाचित र मन्त्री भइसकेका इन्द्रजीत थारु, नमुना केसी समेत मन्त्रीको आकांक्षी छन् ।
एमालेबाट चेतनारायण आचार्य पनि मन्त्री बन्ने लाइनमा छन् । अघिल्लो पटक आचार्य मन्त्री भइसकेका मध्य पर्छन् । यस पटक उनलाई मन्त्री बनाउने समेत तयारी छ ।
