मोरङ । मोरङको सुन्दरहरैँचा नगरपालिकास्थित पूर्व–पश्चिम राजमार्गको एक पुलनजिक ४ वटा सिलिण्डर बम फेला परेको छ।
नगरपालिका–७ स्थित मालती पुलनजिक स्थानीयले बम रहेको जानकारी गराएसँगै सशस्त्र प्रहरी, नेपाल प्रहरी र आर्मीको टोलीले खोजबिन सुरु गरेको थियो।
सोही क्रममा बिहीबार दिउँसो सुरक्षा निकायले पुलबाट करिब १२ मिटर पश्चिम जमिन खनेर लुकाइएको अवस्थामा ४ वटा सिलिण्डर बम बरामद गरेको हो।
जिल्ला प्रहरी कार्यालय मोरङका प्रवक्ता तथा प्रहरी नायब उपरीक्षक वेदप्रकाश जोशीका अनुसार हाल घटनास्थललाई सुरक्षित राखिएको छ।
सशस्त्र माओवादी द्वन्द्वका समयबाटै सो क्षेत्रमा विष्फोटक पदार्थ राखिएको सूचना प्रहरीमा आएको जनाउँदै प्रवक्ता जोशीले हाल पूर्व–पश्चिम राजमार्गअन्तर्गत करिब २ किलोमिटर सडकमा सवारी आवागमनमा रोक लगाएको थियो।
बिहान करिब ८ बजेदेखि सवारीसाधनलाई अर्को सडकतर्फ डाइभर्ट गरी यातायात सञ्चालन गरिएको छ। हाल सो क्षेत्रमा सडक विस्तारको काम जारी छ। फेला परेको बम नेपाली सेनाको टोलीले डिस्पोज गर्ने तयारी गरिरहेको उनले जानकारी दिए।
