काठमाडौं । प्युठान, ऐरावती गाउँपालिका-५ बालीबिसौनास्थित सडकमा रा.१ त ४४४५ नम्बरको ट्याक्टर मंगलबार दिउँसो दुर्घटना हुँदा ट्याक्टरमा सवार सोही गाउँपालिका-२ तेस्रापाटा बस्ने २७ वर्षीय बिजय नेपालीको मृत्यु भएको छ ।
दुर्घटनामा गम्भीर घाइते भएका उनको जिल्ला अस्पताल बिजुवारमा उपचारको क्रममा मृत्यु भएको हो । साथै दुर्घटनामा घाइते भएका ट्याक्टर चालकको मर्सिसिटि अस्पताल बुटवल रूपन्देहीमा उपचार भइरहेको छ । स्याङ्जा, कालीगण्डकी गाउँपालिका-३ आलमस्थित सडकमा आलमबाट बिर्घातर्फ जाँदै गरेको लु.४ त ७८३१ नम्बरको ट्याक्टर अनियन्त्रित भई मंगलबार बेलुकी दुर्घटना हुँदा ट्याक्टरमा सवार बारा गढीमाई नगरपालिका-११ बस्ने २२ वर्षीय सब्दुल अन्सारीको मृत्यु भएको छ ।
दुर्घटनामा गम्भीर घाइते भएका उनको कालीगण्डकी अस्पताल मिर्मीमा उपचारको क्रममा मृत्यु भएको हो । साथै दुर्घटनामा घाइते भएका ट्याक्टरमा सवार अन्य २ जनालाई थप उपचारको लागि लुम्बिनी मेडिकल कलेज प्रभास पाल्पा रिफर गरिएको छ । हाल फरार ट्याक्टर चालकको प्रहरीले खोजी गरिरहेको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।
