काठमाडाैँ / भक्तपुरकाे गठ्ठाघरमा दुर्घटना हुँदा मृत्यु भएकी महिलाकाे अझै पहिचान खुलेकाे छैन।
बिहीबार दिउँसो कोटेश्वरबाट भक्तपुर जाँदै गरेको ना ६ ख २१७३ नम्बरको ट्रकले बा ४९ प ८९४४ नम्बरकाे स्कुटरलाई ठक्कर दिँदा स्कुटर चालककाे महिलाको मृत्यु भएकाे थियाे।
यसअघि काठमाडाैँ उपत्यका प्रहरी कार्यालय रानीपाेखरीका प्रवक्ता प्रहरी वरिष्ठ उपरीक्षक दिनेशराज मैनालीले मृत्यु हुनेमा दाेलखाकाे मेलुङ ४ घर भई काठमाडाैँकाे बागबजार बस्ने २३ वर्षीय सुष्मा नेपाली रहेको जानकारी दिए। तर, मृत्यु भएको भनिएकी सुष्मा नै प्रहरी सम्पर्कमा आएकी छन्।
जिल्ला प्रहरी परिसर भक्तपुरका डिएसपी राजन कार्कीका अनुसार एक व्यक्ति घटनास्थलमा भएकाे कपडा र चप्पल देखेर मेराे बहिनीकाे शव हो भन्दै प्रहरीमा आएका थिए। त्यसैकाे आधारमा प्रहरीले मृतककाे पहिचान खुलाएकाे थियाे। तर, पछि मृतक भनिएकी दाेलखाकाे मेलुङ ४ घर भई काठमाडाैँकाे बागबजार बस्ने २३ वर्षीय सुष्मा नेपाली प्रहरीकाे सम्पर्कमा आएको डिएसपी कार्कीले बताए।
‘उहाँ हाम्राे सम्पर्कमा आउनुभयाे। जसले मेराे बहिनी भनेर आएकाे थियाे ऊ पनि घटनास्थलमा भएकाे सामान देखेर कन्फ्युज भएकाे रहेछ। अहिले हामीले त्याे मान्छेलाई नियन्त्रणमा लिएर साेधपुछ गर्दै छाैँ। थप विवरण आउन बाँकी छ। कारबाही हुन्छ,’ उनले भने।
