ताप्लेजुङ । छिमेकी देश चीन र भारतलाई जोड्ने नेपालको सबैभन्दा छोटो दूरीको नाका ताप्लेजुङको टिपतालामा पहिलो पटक नेपालतर्फबाट गाडी पुगेका छन् । चीनको तिब्बतसँग जोडिएको टिपताला नाकामा हिजो एउटा स्काभेटर र ट्याक्टर पुगेको फक्ताङलुङ गाउँपालिका–७ ओलाङचुङगोलाका वडाध्यक्ष छेतेन शेर्पाले जानकारी दिए ।
टिपताला पाँच हजार एक सय मिटरको उचाइमा पर्छ । विराटनगरको रानी भन्सार हुँदै टिपताला जोड्ने सडकको ट्याक खोल्ने कार्य यसअघि नै सकिएको थियो । यो सडक निर्माणको ठेक्का पाएको एलाइट जेभी निर्माण सेवाले ओलाङचुङगोलासम्म ट्याक खोल्ने काम केही दिनअघि सकेको थियो ।
यस्तै टिपतालादेखि ओलाङचुङगोलासम्मको २४ किलोमिटर दूरीको ट्रयाक खोल्ने काम केही वर्ष अघि नै सकिसकेको छ । सडक निर्माणसँगै ओलाङचुङगोलावासी तथा उत्तरी क्षेत्रका बासिन्दाको वर्षौँदेखिको सडकको सपना पूरा भएको छ । टिपतालादेखि विराटनगरस्थित रानी भन्सार करिब दुई सय ९२ किलोमिटरको दूरीमा जोडिन्छ । टिपतालामा सडक पुगे पनि कोरोना महामारीमा बन्द भएको नाका अझै खुलेको छैन ।
