पोखरा / युवा तथा खेलकुदमन्त्री विराजभक्त श्रेष्ठले पोखरा रंगशालाको निरीक्षण गरेका छन्।आइतबार दिउँसो उनले पोखरा रंगशालाको निरीक्षण गर्दै अवस्थाबारे जानकारी लिएका हुन्।
राष्ट्रिय खेलकुद परिषद्, गण्डकी खेलकुद परिषद्, जिल्ला खेलकुद विकास समिति लगायत खेलकुद संघका प्रतिनिधि, प्रशिक्षक र खेलाडीले मन्त्री श्रेष्ठलाई रंगशाला परिसरमा स्वागत गरे। लगत्तै उनले बहुउद्देश्यीय कभर्ड हलको निरीक्षण गरे।
कभर्ड हल साउण्ड प्रुफ नभएको कारण निकै इको आउने गर्छ। मन्त्री श्रेष्ठले इकोलाई कसरी घटाउन सकिन्छ त्यसबारे बुझ्न निर्देशन दिएका छन्। त्यसमा मन्त्रालयले सघाउने उनको प्रतिबद्धता छ।
‘साउण्ड रिफ्लेक्टर राख्दा कस्ट र टाइमलाइन हेरौं। अभ्यास नै रोकेर काम भयो भने त खेलाडीलाई असर गर्छ’, उनको सझुाव थियो।
उनले पोखरा रंगशालामा रहेको फुटबल स्टेडियमबारेमासमेत जानकारी लिए। स्टेडियमको भौतिक अवस्थाको निरीक्षण गरे।
क्रिकेट मैदानबारे जानकारी गराउदै प्रादेशिक क्रिकेट संघ गण्डकीका अध्यक्ष सञ्जयकान्त सिग्देलले अन्तर्राष्ट्रिय रुपमा ख्याती कमाएको मैदान बजेट अभावले सुविधासम्पन्न बनाउन नसकिएको गुनासो गरे। क्रिकेट मैदानलाई पूर्वाधारयुक्त बनाउन १ अर्ब ७७ करोड रुपैयाँको वृहत गुरुयोजना बनाएपनि बजेट अभावले काम अगाडि बढाउन नसकेको उनले जानकारी दिए।
‘त्यत्रो पैसा त हामीले आशै ग¥या छैनौं, मेरो पालामा त हुन्छ जस्तो लाग्या छैन’, सिग्देलले सुनाए।
बिफ्रिङ सुन्दै गर्दा मन्त्री श्रेष्ठले प्रश्न गरे, ‘क्यानले के भन्छ त्यसमा ?’
‘क्यानले पूर्वाधारमा पैसा दिदैन। अरुमा पनि कसको मान्छे भन्ने हुन्छ’, सिग्देलले भने।
मन्त्री श्रेष्ठले सम्भावना भएको पोखरा क्रिकेट मैदानलाई कमनसेन्स लगाएर पनि बजेट दिनुपर्ने उल्लेख गरे। ‘राजनीति आफ्नो ठाउँमा होला कमनसेन्स पनि चाहियो के !’ मन्त्री श्रेष्ठले झोक्दिै भने।
पोखरा रंगशालामा रहेका आर्चरी, टेनिस र स्वकास कोर्टसँगै मुवाथाइ प्रशिक्षण केन्द्रको पनि मन्त्री श्रेष्ठद्वारा निरीक्षण गरिएको छ।
निरीक्षणपछि मन्त्री श्रेष्ठले पोखरा रंगशालामा भएका संरचनाको संरक्षण नभएकोप्रति असन्तृष्टि जनाए। निर्माण भएका पूर्वाधारले उत्साह जगाएपनि जनताले तिरेको करले बनेका संरचनाको संरक्षण नभएको देख्दा निराश भएको उनको भनाइ थियो। केही संरचना त काठमाडौंको भन्दा पनि गतिलो भएको उनले बताए।
‘यस्तो राम्रो संरचना, जुनले एसिया प्यासफिककै केही खेललाई पनि होस्ट गर्न सक्ने संरचना संरक्षणको मारमा परिरहेको देखें’, मन्त्री श्रेष्ठले भने, ‘मलाई के चिन्ता लाग्यो भने राम्रो संरचना त बन्यो। संरक्षण नभएर खेलाडीकै खुट्टा भाँच्ने हो की ! अब झन्झन बिग्रेर जाने हो कि।’
उनले संरक्षणका लागि मन्त्रालय सहकार्य गर्न तयार रहेको बताउँदै फाइल पठाउन अनुरोध गरे। रंगशालालाई आत्मनिर्भर बनाउन बाटोमा लाग्न उनको सुझाव छ।
मन्त्री श्रेष्ठले खेलकुदमा राजनीति नमिसाउनसमेत खेलकुद संघसंस्थाका प्रतिनिधिलाई निर्देशन दिएका छन्। ‘खेल क्षेत्रमा फोहोरी राजनीति बन्द गर्दिनुुस। राम्रो राजनीति गरौं। बनाऔं, खेलाडीको भविष्य उज्जवल हुने राजनीति गरौं’, उनले थपे, ‘संरचनाहरु बनाउने राजनीति गरौं। राजनीतिक नियुक्ती जस्तो गरेर जनैमा साँचो हालेर खेलाडी र खेल क्षेत्रलाई बन्दक पु¥याउने कार्य बन्द गरौं।’
