पोखरा । नेकपा एमालेका महासचिव शंकर पोखरेलले पुराना दलका कारण नेपाल बनेन भनेर भाष्य खडा गर्न खोजिएकोमा आपत्ति जनाएका छन्। ‘दुनियाँका विकसित मुलुकहरुमा के नयाँ पार्टीहरुले विकासको नेतृत्व गरेका हुन्?’ उनको प्रश्न छ।
शनिबारदेखि सुरु नेकपा एमाले कास्कीको ११ औं जिल्ला अधिवेशन उद्घाटनमा पोखरेलले अमेरिकामा सयौं वर्षदेखि नेतृत्व गरिरहेका पुराना पार्टीले नै जनताको आकंक्षा पूरा गरिरहेको दाबी पेश गरे। ‘नयाँ नीतिको पैरवी पनि पुरानै पार्टीबाट हुने गरेको छ’, उनको भनाइ थियो।
नेपालमा पुराना पार्टी भएन अब नयाँ पार्टी भनेर हल्ला चलाउनुको उद्देश्य नेपाललाई स्थायित्वतर्फ जान नदिने षडयन्त्र भएको उनको आरोप छ।
अस्थिरतामा रुमल्लाइरहन चाहने प्रवृत्तिको सिर्जना नेपालको विकासमा बाधा भएको महासचिव पोखरेलले ठोकुवा गरे। ‘नेपालमा स्थायित्व ल्याउन हामीले भन्न सक्नुपर्दछ, अब धेरै राजनीतिक दलहरु होइन, बलियाँ दलहरुको खाँचो छ’, उनले थपे, ‘नेपाललाई नयाँ नयाँ प्रयोगशाला बनाउने होइन। नेपालको राजनीतिक आन्दोलनमा जनताको परिर्वतनको आकंक्षालाई लगातार नेतृत्व गर्दै आइरहेका दलहरुलाई नै बलियो शक्ति बनाउने कुरामा हामी अगाडि बढ्नुपर्दछ।’
जतिबेला मुलुकमा बलियो शक्ति आवश्यकता हुन्छ, त्यतिबेला जनमत विभाजित भइरहेको महासचिव पोखरेलले सुनाए। ‘नयाँ–नयाँ शक्तिको नाममा, स्वतन्त्रको नाममा, केका नाममा। अनेक नाममा जनमतलाई विभाजित गर्ने’, उनले भने, ‘पार्टीहरुलाई बलियो बनाउने ठाममा पार्टीलाई विभाजित गर्न खोज्ने प्रवृत्ति के राष्ट्रका लागि सहयोगी हुन सक्दछ?’ जनताले जसलाई सबैभन्दा धेरै मनपराएका छन्, उसैलाई शासन गर्न नपाउँदा निराशा छाइरहेको उनले बताए।
जनताको चिन्ताले नयाँ गठबन्धन बनाएर अगाडि बढेको महासचिव पोखरेले उल्लेख गरे। उनले माओवादीसँगै नेपाली कांग्रेससँग पनि सहकार्यको प्रस्ताव राखेको खुलाए। कांग्रेसले नमान्दा माओवादीसँग सहकार्य भएको बताए। तत्कालै समाजवादी मोर्चामा सहभागी नहुने महासचिव पोेखरेलले स्पष्ट पारे।
