नयाँ दिल्ली- भारतको संघीय राजधानी दिल्लीको प्रहरीले अभिनेत्री रश्मिका मन्दानाको ‘डीपफेक’ भिडियो प्रकरणमा एफआईआर दर्ता गरेको छ । दिल्ली प्रहरीको विशेष सेलले घटनाको अनुसन्धान गरिरहेको छ ।
गत नोभेम्बर ६ मा सामाजिक सञ्जालमामा भाइरल भएको एक भिडियोमा रश्मिकाकै अनुहार भएकी महिला देखा पर्छिन् । यद्यपि उनी रश्मिका भने होइनन् । उनी जारा पटेल नामकी युवती हुन् । उनको अनुहार रश्मिकाको अनुहारमा परिवर्तन गरिएको थियो । यसबारे रश्मिकाले सामाजिक सञ्जालमा प्रविधिको दुरुपयोगको कारण उत्पन्न हुने जोखिमबारे पनि चिन्ता व्यक्त गरेकी थिइन् । उनीले लेखेकी छिन्, ‘त्यस्ता कुराहरू मेरो लागि मात्र होइन, प्रविधिको दुरुपयोगका कारण असुरक्षित भएकाहरूका लागि पनि खतरनाक हुन्छन् ।
आज, एक महिला र एक अभिनेताको रूपमा, मलाई समर्थन गर्ने मेरो परिवार, साथीहरू र शुभचिन्तकहरूप्रति आभारी छु। तर यदि म स्कूल वा कलेजमा छँदा मलाई यो भएको भए, म वास्तवमै यसको सामना कसरी गर्ने थिएँ भनेर म भन्न सक्दिनँ। धेरै मानिसहरू प्रभावित हुनु अघि हामीले समुदायको रूपमा यसलाई छिटो सम्बोधन गर्न आवश्यक छ ।’ यो भिडियोमा देखिएका वास्तविक युवती जारा पटेलले पनि नोभेम्बर ७ मा प्रतिक्रिया दिएकी थिइन् ।
जाराले यस डिपफेक भिडियो विवादमा आफ्नो कुनै संलग्नता नरहेको बताइन् । यो घटनाबाट उनी निकै विचलित भएकी छिन् । जाराले भनिन्, ‘यदि यस्तै रहिरह्यो भने भविष्यमा केटी र महिलाले सामाजिक सञ्जालमा आफ्नो तस्बिर र भिडियो सेयर गर्न बन्द गर्नेछन् । दिल्ली महिला आयोगले डीपफेक भिडियोबारे प्रहरीलाई सूचना जारी गरेको थियो । आयोगकी अध्यक्ष स्वाती मालिवालले यस्ता नक्कली भिडियो बनाउनेलाई कडा कारबाही गर्नुपर्ने बताएकी छन् ।
सूचना प्रविधिमन्त्री अश्विनी वैष्णवले यस मामिलामा सोसल मिडियालाई चेतावनी दिएका छन् । उनले डीपफेक प्रकरणमा सबै सोसल मिडियालाई नोटिस जारी गरी नियम पालना गर्न भनिएको जानकारी दिएका छन् ।
