काठमाडाैं । एक साताअघि मेगा बैंकको कामु प्रमुख कार्यकारी अधिकृत (सिइओ) पदबाट राजीनामा दिएकी रविनादेशराज श्रेष्ठले आफ्ना प्रेमीकाे तस्बिर सार्वजनिक गरेकी छन्।
‘मुम्बइ सिफ्ट’ हुन लागेकाे भन्दै कामु सिइओ पदबाट राजीनामा दिएकीश्रेष्ठले बिहीबार सामाजिक सञ्जाल फेसबुकमार्फत आफ्ना प्रेमीकाे तस्बिर सार्वजनिक गरेकी हुन्।
बैंकिङ क्षेत्रमा राम्राे अनुभव बटुलेर इन्टरनेशनल अवार्डसमेत पाउन सफल रविना कलाकार आयुष्मान र आशीरमानकी आमा तथा प्रियंका कार्कीकी सासूआमासमेत हुन्।
हालै जेठा छाेराबुहारी: आयुष्मान र प्रियंकामार्फत नातिनीसमेत देखेकी रवीनाले बिहीबार फेसबुकमा आफ्नो र प्रेमीको तस्बिर राख्दै लेखेकी छन्,’साथीहरू, ३२ वर्षको बैंकिङ करिअरबाट बाहिरिएपछि मेरो जीवन मात्रै परिवर्तन भएको छैन। मेरा पुर्खाहरू र ब्रह्माण्डको आशीर्वादका कारण मैले एकदमै दयालु, सम्मानजनक, कुरा बुझ्ने र मायालु सहयात्री पनि पाएको छु। यो कुरा बाँड्न पाउँदा मलाई अत्यन्त खुसी लागेको छ।’
उनको पोस्टमा उनका छोराहरू आशीरमान र आयुष्मान, बुहारी प्रियंका, बैंकर अनिल केशरी शाह, कलाकार परिमिता राणा लगायतले मायाको इमोजी राख्दै कमेन्ट गरेका छन् भने अरू धेरैले शुभकामना दिएका छन्।
