काठमाडौं । नेपाल विद्युत प्राधिकरणका कार्यकारी निर्देशक कुलमान घिसिङले विद्युतीय चार्जिङ स्टेशन बनाउनका लागि निजी क्षेत्र आउनुपर्ने बताउनुभएको छ । बुधबार नेपाल विद्युत प्राधिकरणले देशभर निर्माण गरेका ५१ वटा चार्जिङ स्टेशनको संयुक्त रुपमा उद्घाटन कार्यक्रममा बोल्नुहुँदै कार्यकारी निर्देशक घिसिङले यस्तो बताउनुभएको हो ।
उहाँले विद्युतीय सवारी साधनको विस्तार र चार्जिङ स्टेशन विस्तारका लागि निजी क्षेत्रको अग्रसरता आवश्यक रहेको उल्लेख गर्नुभयो । निर्देशक घिसिङले निजी क्षेत्रलाई चार्जिङ स्टेशन विस्तारका लागि ल्याउन ऊर्जा मन्त्रालयले नीतिगत सुधार गर्न लागेको बताउनुभयो । उहाँले निजी क्षेत्र आएमा प्राधिकरणले दिनुपर्ने सेवा ट्रान्सफरमरदेखि विद्युत सप्लाईको साइटमा लगानी गरिरहेको उल्लेख गर्नुहुँदै जग्गा र चार्जिङ स्टेशन लगानी गरे अरु सुविधाहरुमा प्राधिकरणले लगानी गर्ने प्रतिबद्धता जनाउनुभयो ।
निर्देशक घिसिङले विद्युत प्राधिकरणले ५१ वटा स्थानको चार्जिङ स्टेशनको एक साथ उद्घाटनले देशभर विद्युतीय सवारी साधनको प्रवर्धनमा सहयोग पुग्ने बताउनुभयो । पछिल्लो समय माइक्रोबस, ट्याक्सी र व्यक्तिगत सवारी साधनहरु गरी धेरै विद्युतीय सवारी साधनको प्रयोगमा वृद्धि भएको उहाँको भनाइ छ । घिसिङले चार्जिङ स्टेसनले गर्दा नेपालको यातायात क्षेत्रमा सस्तोमा यात्रा गर्न सकिने बताउनुभयो ।
‘‘विद्युत प्राधिकरणले ५१ वटा स्थानको चार्जिङ स्टेशन उद्घाटन गरेको छ । यसले देशभर विद्युतीय सवारी साधनको प्रमोसन हुनेछ । भइरहेको पनि छ । अहिले माईक्रो बस तथा ट्याक्सी र व्यक्तिगत सवारी साधनहरु धेरै आएको छ । चार्जिङ स्टेसनले गर्दा नेपालको यातायात क्षेत्रमा सस्तोमा यात्रा गर्न राम्रो व्यवस्था हुनेछ । चार्जिङ स्टेशनबाट चाँज गर्दा पेट्रोलियम पदार्थभन्दा करिब १५ देखि २० गुणा सस्तो छ । अप्रेसन कष्ट शून्य छ भने छ हजार डिजेल पेट्रोल लाग्ने ठाउँमा चार सय रुपियाँले अवस्था आउँछ ।,’’ निर्देशक घिसिङले भन्नुभयो, ‘‘नेपालको विद्युत नेपालमा नै खपत हुन्छ । पेट्रोलियम पदार्थको आयातलाई घटाउँछ । व्यापारघाटा कम गराउने र विदेशी मुद्रा सञ्चितिमा पनि योगदान गर्नेछ । यसले नेपालको ट्रान्सफरमेसनमा ठूलो सहयोग पुग्नेछ । आगामी दिन नेपालको ग्रिन इनर्जि कन्भर्सन हुँदैछौं ।’’
उहाँले चार्जिङ स्टेसनबाट चाँज गर्दा पेट्रोलिय पदार्थभन्दा करिब १५ देखि २० गुणा सस्तो पर्ने भन्दै डिजेल पेट्रोलमा छ हजार लाग्ने ठाउँमा चार सय रुपियाँले पुग्ने अवस्था रहेको बताउनुभयो । उहाँले विद्युतीय सवारी साधनको प्रवर्द्धनले नेपालको विद्युत नेपालमा नै खपत हुने बताउनुभयो ।
उहाँले विद्युतीय सवारी साधनको विकाससँगै पेट्रोलियम पदार्थको आयात कम हुने, व्यापारघाटा कम गराउने र विदेशी मुद्रा सञ्चितिमा पनि योगदान गर्ने उल्लेख गर्नुभयो । उहाँले आगामी दिन नेपालको ग्रिन ऊर्जामा रुपान्तरण भएर नेपालको अर्थतन्त्रलाई राम्रो योगदान पुग्ने अपेक्षा रहेको बताउनुभयो । उहाँले प्राधिकरणले अझै ११ वटा थप विद्युतीय चार्जिङ स्टेसन विस्तार गर्ने जानकारी दिनुभयो ।
उहाँले भन्नुभयो, ‘‘यसले नेपालको अर्थतन्त्रलाई राम्रो योगदान गर्नेछ । ५१ वटा चार्जिङ स्टेशन सुरु गरेको दुई वर्ष भयो । प्राधिकरण ११ वटा थप गर्दैछौं । सरकारले चार्जिङ स्टेसनहरु यात्रा गर्दा सहज हुने गरी बनाउनका लागि निजी क्षेत्रलाई ल्याउनको लागि नीति बनाउन लागिएको छ । बोर्डले निजी क्षेत्रलाई सहज रुपमा ल्याउनका लागि नीतिहरु संशोधन गर्दैछ । निजी क्षेत्र आउनुपर्छ । प्राधिकरणले दिनुपर्ने सेवा ट्रान्सफरमरदेखि विद्युत सप्लाईको साइटमा लगानी गरिरहेका छौं । जग्गा र चार्जिङ स्टेशन भयो निजी क्षेत्रलाई अरु सुविधाहरु प्राधिकरण लगानी गर्छ ।’’
यस्तै, नेपाल यातायात राष्ट्रिय व्यवसायी महासङ्घका उपाध्यक्ष सरोज सिटौलाले नेपालमा नै विद्युतीय सवारी साधनहरुको प्रवर्द्धन गरी विद्युतीय पूर्वाधार तयार गर्नसके नेपालमा उत्पादन भएको जलविद्युत देशभित्रै खपत हुने बताउनुभयो । उपाध्यक्ष सिटौलाले विद्युतीय सवारी साधनलाई सरकारले प्रोत्साहन गरी पूर्वाधार तयार गरे मुलुकमा उत्पादित विद्युतलाई विदेश निर्यात गर्न नपर्ने जानकारी दिनुभयो । उहाँले विद्युतीय सवारी साधनको विकास र विस्तारका लागि विद्युतीय चार्जिङ स्टेशनहरु देशभर ५१ वटा मात्रै नभएर ५१ हजार हुन आवश्यक रहेको उल्लेख गर्नुभयो । सार्वजनिक विद्युतीय सवारी साधनको लागि सरकारले सम्पूर्ण विद्युतीय पूर्वाधार तयार गर्न आवश्यक रहेको दाबी गर्नुभयो । उहाँले सार्वजनिक विद्युतीय ठूला बसहरुको लागि सानो ठाउँमा चार्जिङ स्टेशनले काम नगर्ने बताउनुभयो ।
उपाध्यक्ष सिटौलाले सार्वजनिक विद्युतीय सवारी साधनको विकासका लागि सरकारले सहजीकरण गर्नु आवश्यक रहेको उल्लेख गर्नुभयो । उहाँले सरकारले अहिले भएका नीति तथा कानुनहरुमा सहजीकरण गरिदिनुपर्ने बताउनुभयो । सरकारले गोंगबु नयाँ बसपार्कमा सरकारले विद्युतीय चार्जिङ स्टेशन बनाउन उहाँले माग गर्नुभयो । गाेरखापत्र
