काठमाडौं । गत जेठ ११ गते खानेपानी मन्त्रालयबाट अर्थ मन्त्रालयमा सरूवा भएका सहसचिव शाेभाकान्त पाैडेल भन्सार विभागको महानिर्देशक नियुक्त भएका छन् ।
जनार्दन शर्मा अर्थ मन्त्रीबाट खुस्कनै लाग्दा गत २०७९ मंसिर २९ गते राजस्व प्रशासन सम्बन्धि अनुभव शुन्य रहेका चक्र बहादुर बुढालाई भन्सार विभागकाे महानिर्देशक बनाइएकाे थियाे। बुढाकाे पर्यटन मन्त्रालयमा सरूवा गरिएपछि विभागमा नेतृत्व खाली थियाे ।
भन्सार विभागका महानिर्देशकका लागि भुपाल बराल,इश्वर अर्याल, विभागका उपमहानिर्देशक सेवन्तक पोखरेलको नाम चर्चामा थियो ।
पौडेलले यस अघि ठुला करदाता कार्यालयकाे प्रमुख र आन्तरिक राजस्व विभागको महानिर्देशककाे जिम्मेवारी सम्हालिसकेका छन् ।
जर्नादन शर्माले पौडेललाई २०७८ भदौमा आन्तरिक राजस्व विभागको महानिर्देशक बनाएर पठाएका थिए।
फेरि उनै शर्माले पौडेललाई सरुवा गरेर नेकपा(एमाले) का अध्यक्ष केपी शर्मा ओली निकट दीर्घराज मैनालीलाई महानिर्देशक बनाएका थिए।
पौडेलले अर्थ मन्त्रालयअन्तर्गत रहेको राजस्व व्यवस्थापन महाशाखाको जिम्मेवारी पनि सम्हालिसकेका छन्।
