काठमाडौं । नेपाल दूरसञ्चार प्राधिकरणले सबै इन्टरनेट (इमेल सहित) सेवा प्रदायकहरूलाई दूरसञ्चार सेवा दस्तुरसँग सम्बन्धित कागजात तथा विवरण १० कार्यदिनभित्र पेस गर्न सूचना जारी गरेको छ।
आर्थिक ऐन, २०७३ को दफा ८ को उपदफा ५ मा “दूरसञ्चार सेवा दस्तुरको प्रशासन नेपाल दूरसञ्चार प्राधिकरणले निर्धारण गरे बमोजिम हुनेछ” भन्ने कानुनी व्यवस्था रहेको छ। सोही व्यवस्था अनुसार प्राधिकरणबाट अनुमतिपत्र प्राप्त गरी सेवा सञ्चालन गरिरहेका सेवा प्रदायकहरूलाई यो निर्देशन दिइएको हो।
सेवा प्रदायकहरूले आर्थिक वर्ष २०८२/८३ र चालु आर्थिक वर्षको असोज महिनासम्म नियमअनुसार नेपाल सरकारको राजस्व खातामा दाखिला गरेको दूरसञ्चार सेवा दस्तुरसम्बन्धी आवश्यक कागजात र विवरण पेस गर्नुपर्नेछ। जसमा मुख्यतया इन्टरनेट बिक्री, मर्मत सम्भार, उपकरण बिक्री र अन्य आम्दानीको विवरण, दाखिला गरिएको राजस्व रकम, दाखिला मिति, ढिला भएमा तिरेको ब्याज र जम्मा दाखिला रकमको विवरण, प्राधिकरणले प्रत्येक महिनाको लागि छुट्टाछुट्टै ढाँचामा विवरण तयार गरी बुझाउन समेत निर्देशन दिएको छ। तोकिएको १० कार्य दिनभित्र आफ्नो सम्पूर्ण विवरण र कागजातहरू प्राधिकरणको अनुमतिपत्र व्यवस्थापन शाखा, जमल, काठमाडौंमा पेस गर्नुपर्नेछ।


