तनहुँ । तनहुँको शुक्लागण्डकी नगरपालिका–११ गोटपानीमा बलेरो जिप दुर्घटना हुँदा ९४ वर्षीय वृद्धसहित ६ जना घाइते भएका छन्। दुर्घटनामा एक जना भने सकुशल रहेका छन्।
शुक्रबार (२०८३ कात्तिक २६ गते) दिउँसो करिब ४ः१५ बजे दुलेगौडाबाट स्याङ्जाको चिसापानीतर्फ जाँदै गरेको ग १ ज ७४१० नम्बरको बलेरो जिप दुलेगौडा–चिसापानी पक्की सडकखण्डबाट करिब ५० मिटर तल खसेर दुर्घटना भएको हो। जिपमा चालकसहित सात जना सवार रहेकोमा चालकसहित ६ जना घाइते भएका छन्।
घाइते हुनेमा स्याङ्जाको हरिनास गाउँपालिका–१ खैरिकोटका ३२ वर्षीय चालक शिवबहादुर गुरुङ, २९ वर्षीय अमरबहादुर गुरुङ, ९४ वर्षीय रनबहादुर गुरुङ, ३९ वर्षीया निशा राना, ४८ वर्षीय चन्द्रबहादुर गुरुङ र ३४ वर्षीय मिलन गुरुङ रहेका छन्।
घाइते सबैको तनहुँ सेवा अस्पताल, दुलेगौडामा उपचार भइरहेको छ। दुर्घटनाको कारण खुल्न बाँकी रहेको र घटनाबारे थप अनुसन्धान भइरहेको प्रहरीले जनाएको छ।
