काठमाडौं । तस्करहरूले काठमाडौंको बूढानीलकण्ठमा घर भाडामा लिएर सुनको अवैध धन्दा चलाउने गरेको खुलेको छ । साढे दुई तले सो घरबाट प्रहरीले करिब २१ किलो सुनसहित तीन जना चिनियाँ नागरिकहरूलाई पक्राउ समेत गरेको छ ।
नेपाल प्रहरीको अपराध अनुसन्धान कार्यालय टेकुको टोलीले बिहीबार साँझ सो घरमा छापा मारेको थियो । प्रहरीहरू पुग्दा सुन गाल्ने काम भइरहेको थियो । प्रहरीले उनीहरूलाई नियन्त्रणमा लिने क्रममा केहीबेर धक्कामुक्कीसमेत भएको स्रोतले बतायो ।
प्रहरीले उनीहरूलाई नियन्त्रणमा लिएर घर खातलासी गर्दा सुन गाल्ने, गुणस्तर जाँच्ने र विभिन्न आकारमा ढाल्ने उपकरणहरू समेत बरामद भएको छ ।
प्रहरीका एक उच्च अधिकारीले अनलाइनखबरसँग भने, ‘उनीहरूले ठोस र तरल दुवै स्वरूपमा सुन ल्याउने र आवश्यकताअनुसार विभिन्न आकारमा ढालेर सप्लाई गर्ने गरेको पाइएको छ ।’
ती चिनियाँ नागरिकहरूले च्यानल गेट र सीसीटीभी समेत जडान गरेर व्यवस्थित रूपमा बसेर सुन प्रशोधनको काम गर्दै आएको प्रारम्भिक विवरणबाट देखिएको प्रहरी अधिकारीको भनाइ छ ।
उनीहरूले सुन कुन नाकाबाट ल्याउने गरेका थिए, कसलाई आपूर्ति गर्थे र यसमा अरू व्यक्तिको संलग्नता छ कि छैन भन्ने विषय अनुसन्धानबाट खुल्न बाँकी छ ।
बरामद सुनको वास्तविक परिमाण र गुणस्तर समेत यकिन गर्न प्रहरीले गुणस्तर तथा नापतौल विभागका कर्मचारी र सुनचाँदी व्यवसायीका प्रतिनिधिको सहयोगमा जाँच गरिरहेको जनाएको छ ।
प्रहरीले पक्राउ परेका तीनै जना चिनियाँ नागरिक, बरामद सुन र घटनासम्बन्धी थप विवरण सार्वजनिक गर्न पत्रकार सम्मेलन गर्ने जनाएको छ ।
